كود -إيفي//

قال وزير العدل عبد اللطيف وهبي، اليوم الأربعاء، لوكالة الأنباء الإسبانية «إيفي»، باللي المغرب كيدرس إمكانية تعليق اتفاقية تسليم الأشخاص المطلوبين للعدالة مع إسبانيا، بسبب مشاكل واختلالات فتنفيذ عدد من طلبات التسليم اللي كتصدرها السلطات القضائية المغربية.

وهبي وضح باللي فعدد من الحالات، الشخص المطلوب كيتشد فإسبانيا، وكتتم عملية التحقق من الهوية ديالو، وكيتم تحديد موعد باش يتسلّم للمغرب ولكن، حسب الوزير، وقعات حالات وصلات فيها عناصر أمنية مغربية لإسبانيا باش تستلم الأشخاص المعنيين، قبل ما يتبلغو بأن الشخص تطلق سراحو أو ما حضرش فالموعد المحدد للسفر.

وزير العدل اعتبر هاد الوضعية «غير مفهومة»، وقال بلي المغرب كيتعامل بالمثل مع الطلبات الإسبانية، وكيقوم بتسليم الأشخاص اللي كتطلب مدريد تسليمهم.

وهبي أكد أن الرباط باغية من مدريد تحترم المساطر المتفق عليها وتتعامل بجدية مع طلبات التسليم، وحذر من أن استمرار هاد المشاكل يقدر يدفع المغرب تعليق العمل بالاتفاقية.

وضاف أن المغرب ما بقاش يقدر يستمر فإرسال عناصر أمنية لإسبانيا باش يستلمو مطلوبين، ومن بعد يتفاجؤوا بأن عملية النقل ما تمتاش.

هاد التصعيد الجديد كيجي فواحد الوقت اللي العلاقات المغربية الإسبانية كتعرف نقاشات قوية على عدد من الملفات، خصوصاً الهجرة غير النظامية وإعادة القاصرين من بعد موجة الوصول الجماعي للمهاجرين لمدينة سبتة نهاية يوليوز.

وهبي انتقد حتى الاختلاف بين الرباط ومدريد فطريقة التعامل مع الهجرة. وقال إن المغرب كيبذل مجهودات باش يمنع الخروج غير القانوني من أراضيه، بينما بعض المهاجرين منين كيوصلو لإسبانيا كيقدرو يلقاو إمكانية للقبول أو تسوية الوضعية ديالهم.