كود سبور//

حددت لجنة الحكام فالعصبة الوطنية لكرة القدم الاحترافية، الحكام اللي غيلعبو ماتشات الدورة 4 من منافسات بطولة القسم الوطني الأول، واللي غتلعب اليوم السبت وغدا الاحد.

ومن أبرز الماتشات اللي كاينين، مباراة الرجاء الرياضي اللي غيدخلو اتحاد التواركة غدا الاحد فستاد دونور بكازا مع 7 وربع العشية، وتعيين فيها الحكم حمزة الفارق، وغيعاونو كل من الحكم المساعد الاول ياسين قوبا، والحكم المساعد الثاني ياسين ضميري، والحكم الرابع هو طارق المتمني.

أما بالنسبة لغرفة تقنية الحكم المساعد بالفيديو “الفار”، فماتش الرجاء والتواركة غيكون فيها الحكم محمد بلوط، وغيعاونو محمد فرح.

وبخصوص قمة نهضة بركان والوداد الرياضي، اللي غتلعب فالتيران البلدي فبركان غدا الاحد مع مع 9 وربع ديال الليل، غتعرف رجوع الحكم رضوان جيد بعدما برا من الاصابة اللي كانت وقعت له فماتش الكلاسيكو بين الرجاء وليفار، وغيحكم ماتش بركان والواك، وغيعاونو كل الحكم المساعد الاول لحسن أزكاو، والحكم المساعد الثاني رشيد اللوزاتي، وغيكون حسان الرحماني حكم رابع.

أما غرفة تقنية الحكم المساعد بالفيديو “الفار”، فماتش الرجاء والتواركة غيكون فيها الحكم ياسين بوسليم، وغيعاونو عبد الله شاتو.