احمد الطيب كود الرباط//

واش وزارة الصحة والحماية الاجتماعية، ما تبدل فيها والو؟ ورجعات نفس الأساليب السابقة قبل كاع ميكون فيها ايت الطالب. أي اساليب لي جابت فضايح الصفقات منذ عهد الوزير السابق انس الدكالي؟

مصادر “كود” كشفت بلي عنصر جديد دخل مؤخرا للوزارة، ومحسوب على ديوان الوزير امين التهراوي، داير خبلة وسط الإدارة المركزية. هاد العنصر لي دخل بصفة “مستشارة” الوزير، معروفة كذلك بـ”التسمسير”. المستشارة أو المرأة الحديدية داخل قطاع الصحة، دخلت صحا فكولشي، بدات تنبش فصفقات تجهيز المستشفيات.

هادي معروفة كتحضر لاجتماعات ولقاءات غير مع مسؤولين على الصفقات بالوزارة، بحال بلمداني عبد الوهاب مدير التهجيزات والصيانة ومدير الموارد المالية والتخطيط. هاد السمسارة معروفة بمولات “AUDI8” فهاد الوزارة، عندها تاريخ سيء ف كازا وعندها سوابق فهادشي ديال الملفات وبغات توسط لشي شركة عندي شي مسؤولين داخل القطاع، حسب مصادر “كود”، يلا خلاها الوزير تكمل ف نفس الاساليب غادي تخرج على اي خطة اصلاحية.

وسبق لـ”كود” أن كشفت نقلا عن مصادر موثوقة بلي الوزير الجديد هز الرايا البيضاء، وبان لحد الان بلي ما قادش على هاد القطاع، خصوصا وأنه على علم بشنو كادير هاد السمسارة المنتمية لحزب في الأغلبية. واش تفرضات عليه؟ وكيفاش خلاها؟.

الوزير ما بغاش يهضر للصحافة، ويتجاوب مع أسئلتها . مصادر من داخل الوزارة قالت لـ”كود” :”كاين تناقض كبير بين ما جاء به الوزير الجديد وما نراه اليوم، وبزاف ديال المؤشرات كيبينو غياب الجرأة في اتخاذ القرار”، مضيفة :”النزهاء فالقطاع كانو كيتسناو اعفاءات لمدراء دارو الفضايح ولكن حتى حاجة ما وقعات لحد الان”. وأوضحت نفس المصادر لـ”كود” بلي لا يعقل مثلا مدير ارتبط اسمه بصفقات كورونا باقي كيسير جوج مديريات (واحدة بالنيابة) باقي ما تحيدش.

نفس مصادر “كود” أكدات بلي مدراء نافذين باقين كيتحكمو ف النقطة والفاصلة وفالكواليس ديال القطاع.

الواقع ديال الادارة المركزية بوزارة الصحة، كيقول بلي حتى حاجة ما تبدلات.