كود سبور- الرباط//

فرح الجمهور المغربي البارح الأربعاء مع نجوم الكورة المغربية أشرف حكيمي وياسين بونو بمناسبة تتويجهم بجوائز الاتحاد الافريقي لكرة القدم فـ حفل CAF awards اللي نظموه الكاف بجامعة محمد السادس متعددة التخصصات فـ الرباط، ولكن الفرحة ما كملاتش كيفما خاصها تكمل، حيث هاد اللاعبين بجوج من عطاوش الارتسامات للإعلاميين المغاربة اللي كانو حاضرين فـ الحفل كيفما تعودو ياخدوها من عند المتوجين بالجوائز.

وتلقى اشرف حكيمي وياسين بونو دعم كبير من طرف الجمهور المغربي وايضاً كانت مساندة مطلقة من طرف الإعلام المغربي لهذا الثنائي باش يربح جوائز الكاف، وقدر حكيمي يربح وباستحقاق جائزة أحسن لاعب افريقي لعام 2025 (الكورة الذهبية) ، وربح بونو جائزة القفاز الذهبي لعام 2025 لأحسن گول فـ القارة الإفريقية، ولكن راه ما ختموش الحفل مزيان، حيث كان خاصهم يعطيو ارتسامات للاعلام المغربي باش ينقلو فرحتهم للجمهور المغربي اللي شجعهم وساندهم طيلة سباق التنافس على الجوائز.

فـ بعدما تم تسليم الجوائز للمتوجين بها، توجهو الصحفيات والصحافيين ووسائل الإعلام المغربية وحسب البروتوكول ديال الحفل للمنطقة المختلطة الخاصة بالتصريحات الصحافية، فجا اشرف حكيمي عطى التصريح لقناة bein sport القطرية، وعطى تصريح واحد لباقي الصحافيين ومشى، فـ واحد الجو من الفوضى وسط ممثلي وسائل الإعلام، وباقي الصحافيات والصحافيين ما خداوش كلمة ديالو، ونفس الشي وقع مع ياسين بونو، وملي دخلو الصحافيات والصحافيين لقاعة الندوات اللي غايحضرو لها المتوجين بالجوائز باش يجاوبو على الاسئلة، تفاجأوا بغياب اشرف حكيمي وياسين بونو وجاو مسؤولين الكاف واعتذرو للصحافيين وقالو لهم ما غاديش يدوزو، وبالمقابل راه دازو المتوجين بجائزة احسن لاعب افريقي ممارس بالقارة الافريقية وأحسن مدرب فـ القارة الافريقية، والسنوات الماضية كانو ديما كايدوزو المتوجين بالجوائز عند وسائل الإعلام وكايوسعو الخاطر وكايعطيو التصريحات للإعلاميين، حيث لاعب كرة القدم راه كايولي شخصية عمومية وخاصو يكون معول على هذا الشي ويصبر على انه يعطي التصريحات لوسائل الإعلام اللي حتى هما جايين غير باش يواكبو وقربو الجمهور المغربي من هذا الإنجازات.

وللإشارة راه كاينين شي وسائل إعلام خاصهم يعيدو النظر فـ الناس اللي كايخدمو وكايعطيوهم الميكروفونات والكاميرات، حيث كايسيؤوا لهم وللصحافة المغربية بصفة عامة، بحال الفوضى اللي داروها شي وحدين فـ الحفل البارح فـ المنطقة المختلطة ديال الصحافة، باش ياخدو التصريحات صحا وهذا الشي ما خصوش يتدار واخا گاع اللاعب يرفض يعطي تصريح، والمنابر الإعلامية والصحافيات والصحافيين خاصهم يكونو واعيين بهذا الشي، وماشي يضربو فـ الزيرو العمل الكبير اللي كاتديرو الجامعة الملكية المغربية لكرة القدم برئاسة فوزي لقجع مع الجمعية الوطنية للإعلام والناشرين برئاسة إدريس شحتان لتطوير مجال الإعلام الرياضي باش يواكب تطور المنتخبات الوطنية، خصوصا وان المغرب مقبل على تنظيم تظاهرات قارية وعالمية كبيرة بحال كاس أفريقيا 2025 و كاس العالم 2030، وخاص المنابر الصحافية والصحافيين يكونو مسؤولين ويمشيو بنفس السرعة اللي غاديا بها جامعة الكورة وجمعية الناشرين، ويعطيو صورة زوينة ومثالية على البلاد، ماشي يديرو الفوضى وحداهم وسائل الإعلام الأجنبية كاتفرج فيهم.

وطبعا أشرف حكيمي وياسين بونو هما القادة ديال المنتخب الوطني المغربي، وهاد الثنائي فـ اغلب المناسبات ديال المنتخب الوطني المغربي كايوقفو لوسائل الإعلام فـ المنطقة المختلطة، وكايعطيو تصريحات صحافية، ولكن داكشي اللي وقع فـ حفل الكاف البارح ما خلاش الصحافيات والصحافيين يخدمو بطريقة مزيانة حيث اللي تدافع ودار الفوضى راه طار بشي تصريح واللي كان واقف منظم ومحترم البروتوكول راه ما خداش التصريحات وهذا راه حفل ديال الاتحاد الافريقي لكرة القدم متبعو العالم وما يمكنش صحافي او صحافية يبداو يتخاطفو ويتدافعو باش ياخدو التصريحات حيث هذا الشي غايعطي صورة خايبة على البلاد.