كود سبور//

اعتبر الدولي المغربي اشرف حكيمي ان المغرب عطى فرصة للاعبين مزدوجي الجنسية اللي تزادو خارج المملكة المغربية، بأنهم يلعبو مع منتخب بلادهم ويعيشو هاديك الاجواء ديال تمغرابيت اللي ما عاشوهاش على برا، وقال ان المنتخب المغربي واجد لكاس افريقيا 2025، باش يربحها فبلادو وقدام جمهورو، وانه مستعد باش يلعب مع المنتخب المغربي كاس العالم 2030، اللي منظمها المغرب مع إسبانيا والبرتغال.

وخلال هو له مع جورنال “فوت ميركاتو” الفرنسي، قال اشرف حكيمي اللي عندو الدوبل ناسيونالتي المغربية الإسبانية، واللي فضل يلعب مع المغرب على إسبانيا فين تزاد: “كانشوف ان هذا الشي مزيان، والمغرب داير حوايج مزيانين، وكايعطي الفرصة للاعبين اللي ما تزادوش بالمملكة باش باش يشوفو المنتخب الوطني المغربي وهو كايلعب وينافس فأوروبا والعالم، حنا خدامين مزيان واللاعبين واحدين للدفاع على بلادهم وبلاد والديهم”.

وبخصوص كاس أفريقيا 2025 اللي منظمها المغرب، وحظوظ المنتخب الوطني المغربي باش يربحها قال اشرف حكيمي: “حنا كانفكرو غير فالرباح، وباش نكون صريح حنا غانلعبو على ارضنا وفبلادنا وقدام جمهورنا، يعني حنا واجدين لهذا الشي، وباش نربحو كاس أفريقيا خاصنا نفكرو فحاجة واحدة وهي أننا غانربحو اللقب، وهذا الهدف والحاجة الوحيدة اللي كاينة هي الرباح، الرباح، الرباح”.

وكمل حكيمي وقال: “خاصنا نتحملو مسؤوليتنا، راه لاعبين فبلادنا ومشجعنا جمهورنا، وهذا الشي إيجابي ولكن راه مسؤولية، وفكاس أفريقيا ديما كاينين لحظات صعاب وماتشات معقدين، وفهاد اللحظات غانحتاجو للمساندين ديالنا، وملي كاتكون فالدار وما كاتكونش قادر دير شي حاجة مازال غير ماتسمع الشخص اللي حداك كايغوت وكايشجعك كاتلقى القوة باش تعطي كثر، ومزيان نتحملو المسؤولية”.

وبخصوص واش غايكون مشارك فكاس العالم 2030 اللي غاتكون فالمغرب مع اسبانيا والبرتغال، وغاتكون عندو هاديك الوقت 31 عام، قال حكيمي: “كانوجد راسي كل يوم باش نكون واجد بدنيا، ونلعب لأطول وقت ممكن مع بلدي والفريق ديالي، وفالكورة خاصك تريني على بزاف ديال الحوايج، وراني كانوجد باش نلعب فكاس العالم اللي غايكون فبلادنا”.