گود سبور//

أكد الدولي المغربي اشرف حكيمي وأحسن لاعب فالقارة الأفريقية وسادس احسن لاعب فالعالم، ان المنتخب الوطني المغربي يستاهل ربح لقب كاس افريقيا 2025، واخا هاديك الطريقة اللي ربح بها اللقب، بعد فضيحة انسحاب السنغال فالفينال وتتويج السنغاليين باللقب قبل ما يقرر الاتحاد الأفريقي سحب الكاس منهم ومنحو للمغرب على اعتبار ان المنتخب السنغالي انسحب وبالتالي فهو خاسر بنتيجة 3-0 امام المغرب.

وملي داز فبرنامج The Bridge مع كيليان مبابي وسولوه واش فرحان بالتتويج بكاس أفريقيا، وجاوب اشرف حكيمي وقال: “حنا فرحانين بزاف، تسنينا هاد اللحظة وقت طويل، واخا اضطرينا نربحو بهاد الطريقة”.

للإشارة فالاتحاد السنغالي لكرة القدم قرر يمشي لمحكمة التحكيم الرياضي باش يطعن فقررا لجنة الاستئناف بالاتحاد الافريقي بسحب كاس افريقيا من السنغال ومنحو للمغرب، والجامعة الملكية المغربية لكرة القدم، راه موجدة لجميع السيناريوهات للدفاع على حق المنتخب المغربي.