گود سبور//
أصبح الدولي المغربي أشرف حكيمي ظاهرة مغربية بامتياز، ومثال واعر للنجاح بالنسبة للشابات والشباب المغاربة، اللي ولاو كايشوفو فيه مصدر إلهام وفخر بالنسبة لهم، باش حتى هما يحققو طموحاتهم وأحلامهم ويفيدو بها بلادهم المغرب.
جورنال “گود” خرج للشارع وسول مغربيات ومغاربة الشابات والشباب شنو كايمثل لهم أشرف حكيمي، فكان جواب أول واحدة: “حكيمي مثال زوين لينا كاملين، هو قدوة لينا ومصدر فخر للشباب، المغرب فخور بك وحنا ديما كانساندوك ونشجعوك”.
مشجعة أخرى للمنتخب المغربي قالت على أشرف حكيمي: “أشرف حكيمي أحسن لاعب عندنا وحنا فخورين به، ومشرفنا ونتمناو يوليو عندنا بزاف منو فالمغرب، وكانتمناو له نجاح كثر، لاعب شرف البلاد ديالو فبزاف ديال الماتشات خارج الوطن، وكايبين ديما الحب ديالو للمغرب، وكايفضلو على كلشي، هو قدوة يحتدى به، وديما هاز العلم المغربي، ومكبر بالأم ديالو”.
مشجع للمنتخب المغربي قال فتصريح له على حكيمي: “أشرف حكيمي واحد منا ونتمناوه يربح الكورة الذهبية هذا العام، هو حلم أي مغربي يولي بحالو وكايمثل بزاف ديال الشباب المغاربة، هو إنسان طيب”.
معجبة أخرى بأشرف حكيمي حتى هي عبرت على افتخارها به، وقالت: كايعطينا طاقة إيجابية، والصراحة حكيمي زوين بزاف، ومربي ومؤدب ولاعب كبير وقدوة للشباب المغاربة اللي باغيين يحققو أحلامهم”.
مواطن آخر من عشاق الكورة حتى هو عطى الرأي ديالو فنجم باريس سان جرمان والمنتخب المغربي، وقال: “حكيمي أحسن مدافع فالعالم، وهو اللي غايربح الكورة الذهبية، وهو أحسن لاعب فالعالم دابا، وأنا والشباب المغاربة كاملين كايمثل لنا مثال وقدوة فحياتنا وحتى أنا ما كرهتش نكون لاعب بحالو”.
نفس الشي أكداتو محبة أخرى للمنتخب المغربي، وقالت: “أشرف حكيمي من اللاعبين الكبار ولاعب متميز، وهو قدوة للشباب والأطفال اللي صغار، وبالنسبة لهم مثال ديال النجاح اللي خاصهم يوليو بحالو، أشرف حكيمي مرضي ميمتو، ومرضي ميمتو عمرو ما غادي يخيب ولاعب ممتاز وديما فيه الضحك وديما منشطنا ومضحكنا واللعب معه ديما زوين”.
وختم واحد المحب لحكيمي، وقال: “أشرف حكيمي هو قدوة للشباب المغربي، وهو أحسن لاعب فالعالم دابا، وهو راه مثال للشباب ديال العالم وماشي غير المغرب، وهو ولد الشعب وبغيناه ينصفوه فالكورة الذهبية راه يستاهلها، ونتمناو يكونو بزاف ديال حكيميات فالبلاد ماشي غير واحد”.
