كود سبور//

شرا النجم المغربي أشرف حكيمي، لاعب باريس سان جرمان الفرنسي، فريق فالصبليون عندو معه علاقة قوية.

وكشف موقع Le10sport الفرنسي، نقلا عن وكيل أعمال أشرف حكيمي، أليخاندرو كامانو، أن النجم المغربي شرا فريق سيوداد دي خيتافي الممارس فالهواة ديال الصبليون، وهو النادي اللي بدا فيه حكيمي الكورة، وكاين فحي خيتافي فين كان ساكن مع عائلتو ملي كان صغير، ومن هذا الفريق مشى لريال مدريد.

وباغي حكيمي من خلال شراء هاد الفريق، يعطي حتى هو الفرصة للدراري الصغار فين يتعلمو الكورة ويطورو المواهب ديالهم، كيفما التجربة اللي داز منها هو ملي لقى هذا الفريق فين قدر يصقل الموهبة ديالو قبل ما يمشي لريال مدريد.

وكاين الدولي المغربي فعطلة هاد الأيام، ولي غاتسالي غدا الاربعاء. وعطاه باريس سان جرمان هاد العطلة ملي تأهلو لفينال دوري أبطال أوروبا، الأربعاء الماضي، على حساب ارسنال فالدومي فينال.

وكان تألق حكيمي وخدا رجل المباراة بعدما ماركا هدف من 2 لواحد باش ربحو، وراه دوز حكيمي العطلة بين مراكش والصبليون.