گود سبور//

أكد الدولي المغربي أشرف حكيمي أن تهمة الاغتصاب اللي موجهة له من طرف النائب العام الفرنسي حتى لدابا، بعد شكاية قدمتها بنت فرنسية عام 2023 ضدو، غير كذوب وأن هاذ الشي كلو باطل، وبلي التحقيقات ديال البوليس والخدمة اللي دارو هما والمحكمة غايبينو الحقيقة، وقال إنه تضرر من هاذ الشي هو وعائلتو وولادو بزاف.

وهضر أشرف حكيمي فحوار على برنامج “كليك” غايدوز على قناة + Canal الفرنسية، وقال: “ما عمري تأديت بحال هاكدا من قبل، كان داكشي صعيب عليا بزاف ومازال صعيب، حيث ملي كاتكتب كذبة وكذبة من ورا كذبة، هاذ الشي كايضر، وخصوصا لعائلتي، وولادي مازال صغار، ما كايعرفوش الإنترنت دابا وما كايعرفوش يقراو، ولكن غايجي واحد اليوم غايقراو هاذ الشي، وبالنسبة ليهم راه يشوفو هذا الشي مكتوب على باهم شي حاجة كاتضر، وما نبغيش هذا الشي لحتى واحد”.

وكمل أشرف حكيمي، وأكد: “عارف بلي هاذ الشي اللي متهم به أنا كذوب، وعارف راسي شكون أنا، وعارف بلي ما درت والو وعمرني ندير هذا الشي نهائيا، وديما كنت تحت تصرف البوليس، لدرجة أنا طلب نهضر باش نعاود لهم الرواية ديالي للأحداث، وعندهم حتى الحمض النووي ديالي، وديما كنت تحت التصرف ديالهم بشكل كامل، عكس الشخص اللي اتهمني، واللي ما سهلش الأمور على اللي كانوا محتاجينها، وبفضل الخدمة ديال البوليس، حققنا تقدم مزيان، واليوم كانحس براحة البال، وبغينا تبان الحقيقة فالقريب”.

وهضر أشرف على ما كشفت عليه الصحافة الفرنسية من ميساجات بين البنت اللي متاهماه بالاغتصاب وشي صحبتها قبل ما يتلقا بها فالدار، وقال: “البوليس والمحكمة دارو خدمة مزيانة، لقاو الميساجات، وملي قريتها تصدمت بزاف، ولكن ما جاتنيش مفاجاة، حيث أنا لعاب د الكورة وكانتعرض لهذا الشي، كان صعيب عليا نقرا هذا النوع من الميساجات، ولكن عارف بلي البوليس والمحكمة دارو خدمة مزيانة وهذا الشي غايعاونا حتى تبان الحقيقة”.

أشرف حكيمي قال بلي القضية ديالو دليل على أن اللاعبين كايتعرضو لحوايج خايبين، ووضح: “اللعابا معرضين لبزاف د الحوايج، بحال ملي كايقربو من البنات وشي حوايج بحال الابتزاز، وفعالم الكورة كاينين بزاف د الناس اللي كايبغيو يستغلونا، وإلى ما كانتيش داير بالناس المزيانين غادي تطيح فهاد الشي، وبعدما وقع ليا هذا الشي بدلت بزاف ديال الحوايج والناس، ودائرتي المقربة ضيقة بزاف لدرجة ما بقيت نخلي حد يدخل لها”.

وزاد حكيمي وقال: “الصحافة (الإعلام الفرنسي) كايهضرو على حوايج ما عارفينهمش، وفالخدمة هذا الشي اثر عليا بزاف، وحتى على مستوى السبونسور، وشوهو صورتي حتى هي والسمعة ديالي اللي ضحت عائلتي على قبلها بزاف، ومسو بكرامتي، حيث أنا عارف شنو وقع وداكشي اللي اتهموني به باطل، وهذا جرح غارق فقلوب عائلتي وولادي”.