كود سبور//

كشف الدولي المغربي اشرف حكيمي نجم باريس سان جرمان الفرنسي، أنه كان ضحية عملية بتزاز ملي وجّهت له واحد البنت فبداية عام 2023، تهمة الاعتداء الجنسي على امرأة فرنسية ففرنسا، ووضح انه قرر يمشي فالقضية بطرق قانونية باش العدالة تنصفو، وان هذا الشي اثر عليه بزاف وخلاه يولي ديما حاضي راسو وراد البال مزيان لدرجة انه بعد بزاف ديال الأشخاص من حياتو وولى كايبعد على الناس باش ما يكونش هدف فشي مشكل آخر.

وخلال بودكاست ABtalks توجه لأشرف حكيمي سؤال “انت كنت متهم بجريمة وتبعتي الطرق القانونية… وهذا الشي صعيب، حيث انت مازال صغير وملي كاتكون صغير وناجح وعندك الفلوس كاتولي تبان هدف للناس.. شنو تعلمتي من هذه التجربة؟ وجاوب اللاعب المغربي وقال: “غانكون صادق فهادشي، وهذه هي المرة الاول اللي غانهضر فيها مع شي حد على هذا الشي حيث من هاديك الواقعة اي منذ عامين ما قلتش الرواية ديالي وما هضرتش على هذا الشي، وكيفما قلتي خلينا هذا الشي للقضاء وهي افضل طريقة لتوضيح الامور”.

وكمل حكيمي وقال: “ملي كاتكون ناجح والأمور كاتكون غاديا مزيان عندك، كاتولي هدف سهل لبزاف ديال الناس، وهذا الشي علمني ما نبقاش نثيق في العديد من الأشخاص بالمحيط ديالي”.

ووضح النجم المغربي: “ملي حطينا الأمر بيد العدالة قدرنا نعرفو انه كان غير طريقة للابتزاز وكانوا باغيين يبتزوني وداكشي علاش مشينا فالقضية ومشات الامور مزيان، والعدالة تناولت الأمر بكفاءة وقدرنا دغيا نحلو المشكل وكلشي غايعرف الحقيقة وغانقدرو نهضرو على هذا الشي بسهولة”.

وزاد حكيمي وقال: “هذا الشي علمني نضيق دائرة الثقة اللي كانت عندي، يعني ما بقيتش كانتيق فبزاف ديال الناس وخلصني نرد البال فهاد العالم، وفشي وقت كاتحس براسك عاجز، حيث أنا شاب وكانبغي نتمتع بالحياة كيفما كايديرو اللي بحالي فالعمر ولكن ما تقدرش دابا ندير بحالهم حيث الناس كايعرفوك وخاصك ترد البال حيث الناس ديما كايبغيو يقربو منك، لدرجة انك كاتحس براسك انك ماشي حر وما تقدرش تدير داكشي اللي باغي بحرية”.