احمد الطيب كود الرباط ///

اعلن رئيس الحكومة الاسباني پيدرو سانشيث عن اسماء حكومته قبل قليل بمدريد فتصريح صحافي من قصر مونكلوا. وقال باللي هاد الحكومة فيها 22 وزيرة ووزيرة. لعيالات 12 والرجالة 10 اي كثر. فهاد الحكومة قال عليها سانشيث باللي “حكومة استمرارية” اي ان العمود الفقري للحكومة السابقة مازال كاين فهاد الحكومة. 

هاد الشي بان فنواب رئيس الحكومة او نائباتو: 4 سيدات وهن: النائبة الاولى ناديا كالڤينيو مكلفة بالشؤون الاقتصادية والنائبة الثانية يولاندا دياث المكلفة بالتشغيل والثالثة هي تيريسا ريبيرا المكلفة بالانتقال الايكولوجي. الوجه الجديد فهاد الاسماء هي النائبة الرابعة وهي ماريا خيسوس مونتيرو اللي بقات وزيرة للمالية 

بالنسبة للمغرب رئيس الحكومة رسل رسالة واضحة لينا وهي ان لا تغيير فسياسيتو اتجاه الرباط: خلى وزيرين كيخدم معاهم بزاف وهو وزير الخارجية والتعاون خوسي مانويل الباريس ووزير الداخلية فراندو گران مارلاسكا ونزيدو عليهم جوج وزرا اخرين بقاو فهاد الحكومة ولعبو دور كبير فالتقارب المغربي الاسباني وهما فيليكس بولانيوس اللي بقى وزير الرئاسة وزادو حقيبة العدل وسفير مدريد الاسبق فالرباط لويس بلاناس اللي بقى فحقيبة الفلاحة بالاضافة الي وزيرة الدفاع ماركاريطا روبليس.يعني هاد الشي انو باغي يزيد يقوي كثر علاقاتو مع الرباط اللي كان بدا فابريل 2020 بعد الرسالة الشهيرة الي رسلها سانشيث للملك وفيها اعتراف بمغربية الصحرا

باقي الوزرا هم: حقيبة السياسة المجالية للكناري انخيل فيكتور طوريس والصناعة للكاطالاني خوردي هيروو ووزارة التعليم بيلار اليگريا اللي زادها ناطقة باسم الحكومة وايزابيل رودريگيز اللي عندها دابا حقيبة السكنى ومونيكا كارسيا اللي ولات وزيرة الصحة بالاضافة الى سيرا ريگو اللي خدات وزارة جديدة وهي الطفولة والشباب وبابلو بوتيندوي اللي خدا وزارة الشؤون الاجتماعية والاستهلاك واجندا 2030 ودايانا موران اللي خدات حقيبة العلوم والجامعات وخوسي لويس ايسكريڤا اللي خدا الانتقال الرقمي وايلما سايث اللي خدات الحماية الاجتماعية وآنا رودوندو اللي خدات وزارة المساواة واوسكار بوينتي اللي ولى وزير النقل