كود كازا ///

اللجنة المؤقتة لتسيير قطاع الصحافة كانت رفضات تعطي البطاقة المهنية لحميد المهداوي. مشى دعاها وطلب ياخد ديك البطاقة. البارح لخميس 22 ماي 2025 المحكمة، وفق مصادر “كود”، رفضات ليه الطلب.

وعلمت كود أن المحكمة الإدارية الابتدائية صدرات حكم برفض الطلب في مواجهة حميد المهداوي، بناء على الدعوى اللي رفعها في مواجهة اللجنة المؤقتة لتسيير قطاع الصحافة والنشر، اللي حلات محل المجلس الوطني للصحافة والنشر.

رفض تسليم البطاقة المهنية لموسم 2025، عللاتو اللجنة تاع الصحافة والنشر، بالقانون وفق المادة الأولى من القانون رقم 13/89 المتعلق بالنظام الأساسي للصحافيين، اللي تتقول بأن الصحافي المهني ينبغي أن يكون أجره الرسمي من مزاولة المهنة.

دابا هاد الحكم اللي انتصر للمهنة وللصحافيين، غادي يزيد من قيمة الإعلامي باش ما يكونش تابع لجهة أجنبية ولا تيخدم أي جهة أخرى، وإلى كان أي واحد تيعتامد على الأجر تاعو من يوتوب ولا تيكتوك ولا أي منصة للتواصل، ما خاصوش يطلب البطاقة المهنية تاع الصحافيين.

الصحافي خاص يكون فمقاولة عندها الشروط تاع المقاولة الإعلامية، وإلى كان مدير نشر خاص يحرص على أن يكون عندو صحافيين تيخلصهم وفق القانون بالاتفاقية الجماعية، ويدير ليهم جميع الحقوق تاعهم بحال لا كيس والعطلة السنوية وغيرها، ما شي غير أجي وكون صحافي ولا مدير نشر. القانون فوق الجميع.