عفراء علوي محمدي- كود//

حكمات المحكمة الابتدائية الزجرية فكازا، اليوم الاثنين، ببراءة عبد الله البقالي، رئيس النقابة الوطنية للصحافة، فالدعوى العمومية، وعدم الاختصاص فالمطالب المدنية، فالدعوى القضائية اللي رفعها ضدو مدير “لاماب”، خليل الهاشمي الادريسي.

وحول تفاصيل الدعوى، قال عبد الله البقالي أنها كتتعلق بمقال تنشر فجريدة “الصباح”، فيه تغطية لنشاط نظمتو النقابة فبيت الصحافة فطنجة، وفيه مداخلة ليه، وقال أن المحكمة صدرات هذ الحكم حيت هو ماشي كاتب المقال، وماشي مسؤول عليه، لأن قانون الصحافة فهذ الحالة كيتابع مول المقال ومدير نشر الجريدة. فالمقابل دانت كاتب المقال ومدير نشر “الصباح”

وزاد، فتصريحو ل”كود”، أنها ماشي المرة الأولى اللي كيرفع ضدو مدير “لاماب” الدعوى ضدو فالمحكمة، حيت “هي نفس الدعوى اللي رفعها أمام المحكمة الابتدائية بالرباط، وقضات بعدم الاختصاص، والتجأ إلى المحكمة الزجرية بالدار البيضاء بنفس الدعوى، بعد جلسات كثيرة وعديدة اليوم صدر الحكم، وهو حكم مهم لأنه حكم بالبراءة في الدعوى العمومية وبعدم الاختصاص في المطالب المدنية”.

وقال ان هذا حكم كيبث في الجوهر، وماشي فعدم الاختصاص فقط بحال حكم الرباط اللي فيه فقط عدم الاختصاص، وبالتالي “هذا انتصار للعدل،. انا كمسؤول نقابي كنهضر على المشاكل النقابية فجميع المؤسسات ماشي غير ف”لاماب””، حسب تعبيرو.