الرئيسية > آراء > حكاية ملحدة مغربية. مينة بوشكيوة: فاش قررت مانبقاش نآمن بالله وبالإسلام وبكل الديانات كانت كلمة ملحدة وكافرة كتجرحني وعاوناتني بزاف السوسيولوجيا وانخراطي ف الاتحاد الاشتراكي
22/09/2021 18:00 آراء

حكاية ملحدة مغربية. مينة بوشكيوة: فاش قررت مانبقاش نآمن بالله وبالإسلام وبكل الديانات كانت كلمة ملحدة وكافرة كتجرحني وعاوناتني بزاف السوسيولوجيا وانخراطي ف الاتحاد الاشتراكي

حكاية ملحدة مغربية. مينة بوشكيوة: فاش قررت مانبقاش نآمن بالله وبالإسلام وبكل الديانات كانت كلمة ملحدة وكافرة كتجرحني وعاوناتني بزاف السوسيولوجيا وانخراطي ف الاتحاد الاشتراكي

مينة بوشكيوة – كود//

السؤال الأول : علاش كفرت ؟

هذا سؤال ثقيل والجواب عليه اثقل منه خصوصا أنه مر عمر طويل على النهار اللي قررت فيه مانبقاش نآمن بالله وبالإسلام وبكل الديانات سماوية كانت أو وضعية ونحيد الحجاب ونخرج من الجماعة الإسلامية اللي لقيت راسي مورطة معاهم بزز مني، فهاديك ذيك الفنرة، فاش خديت القرار، كانت كلمة ملحدة وكافرة وخارجة على الدين فاش يقولها لي شي حد من أفراد الأسرة أو الأصدقاء أو الزملاء كنحس بأنها كتجرحني مكنفهمش علاش، ولكن مع تقدمي فالسن والحياة والتجارب بحلوها ومرها، بديت كنتيقن أنني لم أخلق للدين ولأفكار المجتمع المغربي، وعاوناتني بزاف السوسيولوجيا والأدب وانخراطي في صفوف الاتحاد الاشتراكي فاش كنت طالبة فالكلية بالرباط وولات صفة ملحدة وكافرة وسام شرف وميزة ورمز شجاعة أحملها فوق رأسي مهما كلفني ذلك من معاناة وعذاب وحكرة واضطهاد وظلم من طرف اسرتي واصدقائي وصديقاتي وزوجي السابق وأسرته وابنتي وزملائي وزميلاتي وقرائي على فايسبوك..

حكايتي غنقسمها لفصول وفكل فصل كنتطرق فيه لكل مرحلة من مراحل حياتي منذ الطفولة حتى لفترة مغادرتي للمغرب نحو كندا لطلب اللجوء بسبب الاضطهاد والعنف والظلم ضد حرية معتقدي وتعبيري على ذلك بالكتابة.

السؤال الثاني : علاش بغيت نحكي ليكم ؟

بغيت نحكي لأجل حفيدتي اللي عمرها يالله أربع سنوات باش ماتغرقش وتضيع وتقولب فالكذب ديال أسرتي عليها فاش تسولهم علاش جدتي “ماماتي” كيف كتسميني ولات كافرة وعلاش ولات لاجئة وعلاش هي مختلفة عليكم؟

بغيت نحكي من أجل ولاد إخوتي اللي فيهم اللي كبر وحتى هو خرج من الإسلام وكفر بكل مافرض عليه بقوة وتشدد مبالغ فيهم والباقيين صغار غاديين فطريق الكفر والتحرر لاريب فيها.

بغيت نحكي لأجل أو ضد أختي المنتمية لجماعة العدل والإحسان اللي عنفتني وضربتني وجرحتني واعتدت عليا جوج مرات فداري هي وزوجها الاخوانجي وسيلت دمي وهددتني بالقتل بوضع سكين على عنقي وهي كتقول لي :” الجهاد فيك ياكافرة طريق نحو الجنة مع الصديقين والشهداء ولكن غنخليك تعيشي لأني عارفاك غتنتحري في يوم من الأيام” كنكتب باش نقول ليها راه الكتابة والتعبير عن أفكاري اللي حاولت تقتليني بسببهم هوما الآن الملح اللي كنرش على الجراح اللي جرحتيني ضد النسيان وضد الكذب وضد الموت.

وأخيرا بغيت نقول علاش كفرت، لكل تلامذتي اللي درسوا عندي فالمغرب طيلة 29 سنة  بالرباط وعين العودة وزاكورة من الابتدائي إلى الثانوي علاش أنا كأستاذة كنت مختلفة وخارجة على سكة المجتمع ونمط تفكير وسلوك أساتذتهم الغارقين في وحل التفكير الديني المنافق وازدواجية القول والفعل وخماج التناقضات اليومية.

وما نساش أنني اكتب للمغاربة وخصوصا كل النساء الشابات اللي خرجو من الإسلام في الوقت المناسب أو ربما بعد فوات الأوان…

موعدنا مع الحلقة الأولى بعنوان : مينة بنت يعقوب المنصور

 

موضوعات أخرى

28/10/2021 06:00

البرتغال حتى هي حاطة عينيها على الطاقة المتجددة ديال المغرب باش متبقاش معتمدة على الجزائر وروسيا وها اش قال رئيس الوزراء البرتغالي