كود سبور//

رجع عبد الإله حفيظي لاعب الرجاء الرياضي يخلق الجدل، وفبلاصة ما يبرك يوجد مع الفريق ناض هز ساكو ومشى لفرنسا يتسارا.

عبد الإله حفيظي وفبلاصة ما يركز ويخدم على راسو باش يرجع الفورمة بعدما نزلو المكتب المديري د الرجاء الرياضي من الفريق الأول إلى ليسبوار حيث ما منضابطش، ناض سافر لفرنسا وباريس وحط سطوريا فانستغرام وهو فبطولة رولان كاروس د التنس، فحال إلى كيقول راني كاعما مسوق.


هذا البلان ديال عبد الإله حفيظي من المنتظر يسلط عليه غضب الرجاويين كثر وكثر، خصوصا وأنعم مقالقين عليه مدة هادي بسبب النيفو ديالو اللي نزل وكذلك بسبب شي ردود فعل بحال ملي شداتو الكاميرا وهو كيضحك فماتش البطولة الإحترافية  ضد أولمبيك خريبكة والخضرا كانت يالاه تقصات من عصبة أبطال إفريقيا وخرجات من لاكورس على البطولة، وهذه كلها عوامل كتبين بلي حفيظي كيدوز الأيام ديالو الأخيرة مع الرجاء خصوصا وأن المكتب الجديد ديال بودريقة بادي بفرض الانضباط فالفريق، وهو وزكرياء حدراف ويسري بوزوق تعاقبو بالنزول لفريق الامل يتدربو معه.