كود هند لكلاوي مراكش ///
علمت “كود” ان حفل الرقص اللي كان نهاية الاسبوع الفايت ف”نيكي بيتش” فمراكش وبانو فيه بنات كيشطحو مع ولاد وناضو شي حقوقيين عقلهم فحجرهم واعتبرو هاداك الشي “دعارة راقية” ودخل القضاء وتفتح تحقيق٬ كان حفل داروه لبنات لصاحبتهم قبل عرسها. اي حفل توديع حياة العزوبية واللي معروف عند فئة فالمجتمع المغربي.
الحفل جابو ليه ولاد شطحو معاهم ونشطو وما كانوش ينتاظرو باللي غادي يدير مشكلة. تصوير شي واحد ليه ونشر الفيديوهات هو اللي نوضها.
التحقيقات كانت بدات بعد ظهور الفيديو واستمرت بالاستماع لكاع اللي عندو علاقة بالفيديو من مول المشروع الى اللي بان فالفيديو.
دابا كيفاش غادي تفسر ليهم راه هاد الشي ماشي جنس. راه كيف كيسميوه برا “رديم او دفن فترة من حياة الشابة” اي دفن التزوفريت او العزوبية واستقبال حياة الزوجية.
