كود ـ كازا//

منعش عقاري فالمنصورية، معروف في “لافيراي ديال سباتة”، رونها هوا ورئيس جماعة المنصورية، بعد ما باع للناس شقق في مشروع سكني مكون من إقامات، للملاك، ونصب عليهم حيت باع ليهم شقق في مشروع مغلق، قبل ما يكتاشفو أن القضية ما فيها لا مغلق لا مولاي بيه، وناض المقاول دابا تيهدد السكان باش يحيدو الباريير، بمساعدة رئيس الجماعة، حيث بغا يبيع فرماسيان، وطلبو منو أن الصيدلية خاصها تكون مفتوحة على الشارع، وهو يفكر في إزالة الباريير.

السكان رفضو وناضو دارو احتجاجات، تيصرحو فيها بلي شراو في إقامة مغلقة وهما اللي تيخلصو الماء والضو، وهما اللي دارو الحديقة وهما اللي بناو الشانطي، والجماعة متتقدم ليهم والو، وعندهم الفاكتورات على حساب السانديك تاعهم.

المنعش ورك على رئيس الجماعة وعطاه قرار بلي الباريير، ماشي قانوني، واعتمد عليه باش رفع دعاوى تيهدد فيها السكان، وصيفط واحد للقايد باش يريب الحاجز.

دابا من بعد 12 عام، وهو تايبيع البارطمات على أساس إقامات مغلقة، وملي كمل البيع بغا يحيد الباريير، وعلاش داروا في الأول، وعلاش السلطة ماحيداتوش ديك الساعة باش تفرشو، ويعيقوا السكان، وعلاش رئيس الجماعة نعس حتى لدابا رغم أنه أزيد من 20 عام وهو رئيس.

وشكل القرار خيبة أمل السكان، لأنه كيهدد أمنهم وسكينتهم، لوجود الإقامة في منطقة نائية وخلاء، ولأنه يضرب عرض الحائط الوضع القائم.

السكان، للي أغلبهم مهاجرين وشراوا بثمن كبير، كيطلبو من الجهات المعنية تنصفهم وتدير بحث فالنازلة، اللي كانت مصيدة طيحات الناس في الفخ تاع المنعش.