أنس العمري-كود///
داهمات السلطات الأمنية، بالتنسيق مع السلطات المحلية، مساء أمس الثلاثاء، فيلا فحي عين السبع فكازا، كانت كتستعمل كوحدة سرّية لصناعة المعجنات المعروفة بـ”الشعرية الصينية”.
وخلال العملية، لقات المصالح الأمنية كميات كبيرة من المعجنات اللي ما صالحاش للاستهلاك، وزيد عليهم مواد غذائية فاسدة كانت كتستعمل فعملية الإنتاج.
المعطيات الأولية كتقول إن الفيلا ديال مواطنين صينيين، والمصالح المختصة بدات تحقيقاتها باش تعرف شكون بالضبط المتورطين فهاذ النشاط غير القانوني، وكيفاش كانو كيشغلو المكان.
العملية سالات بتوقيف ستة ديال المشتبه فيهم، واللي دّاتهم الشرطة للمقر ديالها باش يبداو البحث التمهيدي تحت إشراف النيابة العامة المختصة.
