كود سبور//

حطم المنتخب الوطني المغربي الرقم القياسي العالمي، وولى المنتخب الوحيد فـ العالم اللي محقق أكبر سلسلة ديال الرباحات فـ التاريخ.

https://www.facebook.com/share/p/19tkwX9cuH/?mibextid=wwXIfr

وقدر المنتخب الوطني المغربي يربح منتخب الكونگو اليوم الثلاثاء فـ تيران مولاي عبد الله فـ الرباط، برسم الجولة 10 والأخيرة من أقصائيات كاس العالم 2026، اللي تأهل لها المغرب قبل 2 دورات، وسالا الماتش بنتيجة 1 لزيرو لمصلحة الأسود، بهدف ماركاه يوسف النصيري فـ الشوط الثاني، مع العلم ان الناخب الوطني وليد الركراكي مازال ما لقاش حلول للمنتخبات اللي كاترجع لها للوراء ما كايلعب ضد المغرب، واخا ليكيب ناسيونال كايسيطرو على الكورة.

وعرف الماتش بين المنتخب الوطني المغربي، حضور عدد مهم من الجمهور، وصل العدد ديالهم حسب معلق تيران مولاي عبد الله إلى 50292 متفرج، وهذا الشي رغم ان شي وحدين دعاو للمقاطعة مع العلم ان الماتش راه كان عادي وما عندوش شي قيمة كبيرة حيث المنتخب المغربي ديجا ضمن التأهل.

المنتخب الوطني المغربي بهذا الرباح حقق رقم 16 رباح متابعين، وولى اول منتخب فـ العالم كايوصل لهذا الرقم القياسي، بعدما حطم الرقم ديال 15 رباح اللي كان عند الصبليون.

وزكى المنتخب الوطني المغربي صدارة المجموعة الخامسة من إقصائيات كاس العالم 2026، سالا الكاليفيكاسيون برصيد 27 نقطة، فـ گروب كانت فيه منتخبات النيجر اللي احتلت المركز الثاني برصيد 15 نقطة وعادي تلعب الملحق، وتنزانيا الثالثة برصيد 10 نقاط، وزامبيا الرابعة برصيد 9 نقاط، والكونگو الخامسة برصيد نقطة واحدة.