الرئيسية > آش واقع > حصيلة كورونا لهذ النهار: فرانسا سجلات أكبر حصيلة وفيات ف24 ساعة فالعالم.. والشينوا ماسجلات حتى وفاة لأول مرة مللي ظهر الفيروس والطاليان حققات تراجع فعدد الإصابات والوفيات
07/04/2020 19:29 آش واقع

حصيلة كورونا لهذ النهار: فرانسا سجلات أكبر حصيلة وفيات ف24 ساعة فالعالم.. والشينوا ماسجلات حتى وفاة لأول مرة مللي ظهر الفيروس والطاليان حققات تراجع فعدد الإصابات والوفيات

حصيلة كورونا لهذ النهار: فرانسا سجلات أكبر حصيلة وفيات ف24 ساعة فالعالم.. والشينوا ماسجلات حتى وفاة لأول مرة مللي ظهر الفيروس والطاليان حققات تراجع فعدد الإصابات والوفيات

عفراء علوي محمدي- كود//

تجاوزات عدد الإصابات المؤكدة بمرض “كوفيد 19” اللي كيتسبب فيه فيروس كورونا فالعالم مليون و410 ألاف حالة، توفاو منهم أكثر من 81 ألف مصاب، في وقت اللي تعافى فيه 300 ألف شخص، وهذشي حسب آخر الأرقام اللي نشرتها اليوم الثلاثاء جامعة جونز هوبكنز الأميركية اللي كتراقب انتشار الوباء.

الوضعية ديال فرانسا مع فيروس كورونا المستجد مقلقة بزاف، حسب آخر الأرقام الرسمية، بلغات أعلى نسبة ديال الوفيات ف24 ساعة اللي ممكن تحققها شي دولة، بحيث تجاوزات سقف ألف و400 إصابة، فرانسا كذلك حققات رقم كبير فعدد الإصابات اليوم واللي هو 11 ألف و59، وتجاوزات الشينوا وألمانيا فالطوطال، بحيت بلغات 109 ألف و69، واحتلات بهذشي المركز الرابع.

الشينوا، اللي جا منها الفيروس فاللخر ديال شهر دجنبر، اليوم ماسجلات حتى حالة ديال الوفاة، وهذي لأول مرة كتوقع ليها منهار انتشر فيها الوباء، وبالنسبة للإصابات فسجلات غير 32 إصابة، باش يولي مجموع الإصابات عندها هو 81 ألف و740، ومايتزعزعش عدد الوفيات عندها من لبارح ويبقى ف3 آلاف و331، وتكون بالتالي تراجعات للمركز السادس.

وميريكان مزالة فالمركز الأول، وأعداد الوفيات والإصابات كترتفع فيها نهار على نهار، بحيت سجلات 386 ألف و194 حالة إصابة، فيما توفي جراء الإصابة بالمرض فميريكان 12 ألف و246 حالة وفاة، بزيادة ألف و375 وفاة غير اليوم.

كاتجي سبانيا فالمركز الثاني عالميا، ب140 ألف و511 إصابة بالفيروس، مع مجموع وفيات ديال 13 لألف و897، وللإشارة غير هذ اليوماين استطعات إسبانيا تفوت إيطاليا فعدد الإصابات بالفيروس، لكنها مافاتهاتش فعدد الوفيات اللي هو الأعلى فالعالم، واللي هو 17 ألف و127.

وسجلات إيطاليا انخفاض طفيف فعدد الإصابات هذ الأسبوع بالمقارنة مع قبل، بحيت فالوقت اللي كانت كتسجل من 4 آلاف حتى ل5آلاف إصابة فاليوم الواحد، اليوم سجلات غير 3 آلاف و39 إصابة، وبالنسبة للطوطال فبلغ 135 ألف و586 إصابة، وحتلات بهذ الرقم الطاليان المركز الثالث عالميا، وحتى عدد الوفيات انخفض عندها، بحت سجلات اليوم غير 604 وفاة، فالوقت اللي كان 636 لبارح الاثنين.

ألمانيا مزال عندها أعداد وفيات قليلة بالمقارنة مع الإصابات، ألف و942 وفاة فقط من أصل 106 ألف و739 إصابة، وبهذشي كاتجي ألمانيا هي الخامسة عالميا.

بالنسبة لدول الشرق الأوسط وشمال إفريقيا، كتحتل السعودية المركز الأول من حيث عدد الإصابات بألفين و795، و41 حالة وفاة، تابعاها الإمارات بألفين و76 إصابة و11 وفاة، ثم قطر فالمركز الثالث بألفين و57 إصابة و6 وفيات، وكتجي الجارة الجزائر فالمركز الرابع بألف و468 إصابة، منها 193 ديال الوفيات.

موضوعات أخرى

06/06/2020 14:00

شكون يديها فحالة لمغاربة النفسية. راه 3 شهر ما عارفينش شحال من واحد تزير وشحال جاه اكتئاب وشحال فكر فالانتحار