كود كازا//

تحقيق ل”برلمان.كوم”، كشف تفاصيل مثيرة ديال صفقة فيها البيع والشرا ديال عقار فاخر فظروف غريبة، وتجبد فيها عبد الوافي لفتيت وزير الداخلية.

فهاد لونكيط لي شرحات تفاصيل بدرية ف”ديرها غا زوينة” على قناة يوتوب ل”برلمان.كوم” بلي الوزير عبد الوافي لفتيت شرى ملك عقاري سميتو “فتيحة 1” في منطقة سيدي يوسف بن علي بمراكش، مساحتو كتر من هكتار (10,300 متر مربع)، وفيه فيلا، بئر، وأشجار تفاح.

وهضر موقع برلمان.كم، على “لثمن “البخس” باش شرا لفتيت هاد العقار، وهو 7 ملايين و100 ألف درهم، في حين أن الخبراء كيقدروا القيمة الحقيقية ديالو في 2017 بين مليار ونص و3 مليار سنتيم، ودابا كيسوى كتر بزايد.

وحسب نفس لونكيط، العقار داز عبر شركة لرجال اعمال معروف كان شراه من عند الدولة وباعو للوزير لفتيت من بعد 5 شهور ونص فقط، بلا ما تربح فيه حتى درهم، بل وخسرات فيه مصاريف التسجيل، وهنا كيتسغرب موقع برلمان.كم، من هاد التفويت.

وفق نفس المصدر، هاد الشركة شرات العقار من عند الدولة، ب7 مليون درهم، تخلقات ف شهر مارس 2021، شرات العقار ف28 شتنبر 2021 باش تبيعو لفتيت ف 16 مارس 2022 يعني مور 5 شهور. والغريب بنفس الثمن.

وهضر لونكيط على عملية الشراء للي تمت شهرين بعد قرار “التجديد الحضري” للدوار (تلاغت) اللي فيه الفيلا، وهو القرار اللي تخذو مجلس جماعة مراكش برئاسة المنصوري في دجنبر 2022.

هاد القرار نتج عليه هدم منازل الساكنة المجاورة بتعويض هزيل جداً (110 دراهم للمتر المربع)، باش تولي المنطقة صالحة لتجزئات الفيلات الراقية. وفق الموقع الاخباري “برلمان”.

عليها خاص النيابة العامة تفتح تحقيق لان اللي جا فالحلقة خطير بزاف