عمـر المزيـن – مكتب الرباط//

حصلت “كود” على معطيات مثيرة حول الزيارة الملكية، التي كانت من المؤكد أن يقوم بها الملك محمد السادس إلى مدينة فاس، مساء اليوم الجمعة، قبل أن يتقرر تأجيلها في آخر لحظة. التأجيل دوخ المسؤولين كولهوم ديال لمدينة وحتى شي حد مفهم شي حاجة.

والي جهة فاس مكناس مفهم والو:

سعيد زنيبر والي الجهة مابقة فاهم والو. السيد هادي اكثر من شهر وهو خارج داخل من البيرو ديالو باش تدوز هاد الزيارة في أحسن الأحوال. كان متبع الأمور كولها مع المصالح الخارجية ديال ولاية الجهة، مع ترأسه اجتماعات بشكل شبه يومي باش كولشي يدوز على خير وتعلم اكثر من مرة بتأجيل الزيارة. لكن الزيارة الأخيرة ديال الجمعة كان كولشي واجد فيها.

على طول شارع الجيش الملكي وطريق إيموزار كان كولشي منتشر. مخازنية وبوليس ورجال سلطة والكل في انتظار الزيارة الملكية. المسؤولين ديال لمدينة طارو لمطار فاس سايس. وكاين اللي بقا تما لساعات. المفاجئة أنه في آخر لحظة كولشي تعلم باش يرجع بحالو حقاش الملك مغاديش يجي. الوالي مابقة فاهم والو.

فاس تتزين وحملات أمنية يومية:

قبل أيام قليلة من الزيارة ديال الملك كانت تعبئة كبيرة ديال عمالة النظافة اللي تابعين لشركة “أوزون”. الخدمة ليلا نهارا. عملية جمع النفايات شملت مختلف أحياء المقاطعات وحتى اللي مغاديش يوصل ليها الملك ناضو يخملوها من الزبل. علاوة على ذلك. والي أمن المدينة دار اجتماع مع رؤساء المصالح والمناطق الأمنية الأربعية من أجل وضع الترتيبات الأمنية لهاد الزيارة.

مصادر محلية قالت لـ”كود” على أن البولبس كان منتشر بكثرة وشن حملات واسعة استهدفت بزاف ديال المشتبه فيهم، ورفعت مصالح الشرطة بالمدينة من الوتيرة ديالها، سيما بعد علم الجميع بأن الملك غادي يوصل لفاس مساء اليوم الجمعة. المهم هاد التأجيل كانت فيه رسائل واضحة إلى من يهمه الأمر.

غضبة ملكية على مسؤولي المدينة:

قبل أشهر قليلة كان المستشار الملكي فؤاد عالي الهمة جا لفاس ووقف بنفسه على عدد من المشاريع قلب المدينة العتيقة. هذا طبيعي. حقاش أي زيارة الملكية تسبقها زيارة ديال مستشار… هنا وقع المشكل. تشرح مصادر “كود” أن الهمة وقف على الوضع المتأزم الذي تعيشه المدينة.

كانت رسائل واضحة من الجهات العليا من خلال تأجيل الزيارة لأكثر من مرة. فاس عمرها كانت غادية بهاد الشكل. ربما المسؤولين ديالها هملوها وكول مسؤول كيجي خاصو يدوز وقتو ويمشي بحالو. لكن المدينة كتزيد تاكل لعصا مزيان سواء في سياحيا او اقتصاديا.

الكل مزال ينتظر:

رغم تأجيل هاد الزيارة، فإن مسؤولو المدينة مزال كيساينو ورجحو أن هاد الزيارة غادي تقدر تكون قريب حقاش مزال البوليس ممشاو كولهوم..

هذا ولا زالت الساكنة الفاسية تنتظر زيارة  الملك، إحدى المواطنات قالت لـ”كود”: نتمناو من سيدنا يقا لينا فاس شي مدة طويلة ويشوف من حال هاد لمدينة راه المسؤولين ديالها سمحو فيها.