كود – وكالات//

تخيل راسك ناعس فالسبيطار، حتى كتشوف ملك الموت واقف كيشير لك، هادي ماشي حلمة وإنما حقيقية دازت فواحد السبيطار فويلز البريطانية.

القصة بدات فـ6 يونيو، ملي طلع عزري عندو 26 عام، سميتو ليون غيليسبي، لسطح سبيطار «يسبيتي غلان كلويد» فمدينة سانت أساف، وهو لابس الكحل ومغطي راسو باش يبان بحال”حصاد الموت “

الشاب  كان هاز مادرية ديال حصادة الموت، وبقى فوق السطح  50 دقيقة، كيشوف فالمرضى وكيدير أصوات خلاتهم يبقاو بلا نعاس.

وداخل السبيطار، أكيد ما كانش المنظر ساهل. المرضى جايين باش يتعالجو ويقلبو على الهدوء، ماشي باش يلقاو واحد متنكر فالموت كيتفرج فيهم من فوق السطح. وبدل ما يكون السطح مجرد جزء من بناية السبيطار، ولى للحظات بحال منصة لمشهد رعب غير متوقع.

البوليس والبومبية دخلو باش يحيدوه من تما ،ومن بعد ما داز التحقيق اعترف بالمنسوب ليه وما حاولش ينكر.

المحكمة حكمات عليه بخطية ديال 200 جنيه إسترليني،يعني 233 أورو، بعدما تحكم بالتسبب فالتبرزيط وسط مؤسسة تابعة للخدمات الصحية الوطنية البريطانية.

والغريب أن هادي ماشي أول مرة كيوقع فيها غيليسبي فمشكل مع القانون، حيث سبق ليه تحكم بسرقة ماكلة ديال القطةط من محل لبيع مستلزمات الحيوانات.

الواقعة كتخليك فعلاً تسول، شنو كان باغي يوصل بهاد الاستعراض؟ الجواب ما بانش، ولكن الأكيد أن المرضى اللي كانو كيتفرجو فيه ما كانوش محتاجين لهاد الخلعة لي خلاتهم يحسبو سوايعهم.