كود//

السعودية الي كنضربو بها المثل فعدم احترام الحريات الفردية، والفرد، والخصوصيات ديالو دارت قانون كيجرم تجسس الزوج أو الزوجة على التيليفون ديال الآخر بطريقة غير مشروعة، وجا هادشي ضمن لائحة نظام الجرائم المعلوماتية.

وكينص النظام على السجن لمدة عام، وغرامة مالية ديال 500 ألف ريال، ولا بوحدة من هاد العقوبتين.

ووفق موقع “العربية”، فإن العقوبة كتلحق بالزوج أو الزوجة في حال الدخول بطريقة غير مشروعة للسمارتفون ديال الآخر، وباش تتبث حالة الدخول غير المشروع خاص يكون الهاتف محمي بكلمة مرور، وتختارق.

والمغرب مازال متخلف بزاف بزاف فهادشي ديال الخصوصية عامة، والخصوصية الرقمية خاصة، بحيت ماعندنا حتى قوانين واضحة كتجرم هتك الخصوصية وكتعطي الحق للضحية.

شحال من مرة كنسمعو بنت مراهقة اختارقلها شي واحد السمارتفون ديالها وهددها ومكتقدرش تلجأ للقانون حيت كتخاف تولي حتى هي معاقبة، وهادي حال المتزوجين أيضا.

ضروري من شي تحديث مستعجل لهاد القوانين البالية حيت هذا القرن 21، ونصف الحياة ولات فالهاتف الذكي، ولازم هاذ المجال يكون مقنن.