كود هناء ابو علي ////

عبد الاله بنكيران خسارة للحياة السياسية بالمغرب. خسارة داهية بحالو فالسياسة وبعد ما دوز الاحتراف يرجع يلعب مع الهواة. عودتو لحزب خاوي فارغ اللي هو العدالة والتنمية انتحار ليه واللي دفعوه يرجع كانو كيتسناوه يطيح فالفخ. 

بنكيران ضاع فالامور التنظيمية واعتاقد انو يقدر يرجع الروح لحزب فقدها فحكومة بنعرفة. العثماني دار كلشي باش يقتل هاد الحزب مع صحابو. عطاه كثر من جثة. ما خلى فيه لا روح ولا امل للعودة. بنكيران بقدر ما هو داهية فالامور لكبيرة كيتقولب فالامور العادية. قبول رئاسة الحزب كان فخ طاح فيه.

احسن ما دار بنكيران من نهار رجع لهاد الحزب هو الرد على بيان الديوان الملكي. الديوان الملكي كان دار بيان غريب رد عليه على بيان لحزب المصباح هجم فيه على وزير الخارجية ناصر بوريطة. الديوان الملكي قال باللي السياسة الخارجية شأن ملكي. وطبعا كان بيان قاصح من الديوان الملكي لحزب سياسي.

كلشي اعتاقد باللي هاد البيان ضربة كبيرة لبنكيران بالضبط لشخصو ماشي لحزبو. طبعا هنا بان واعر. هو ماشي حزبو. الرد ديالو على البيان درس كبير. طبعا سياسي دوز رئاسة الحكومة وخبر موازين القوى فالدولة العميقة والسطحية وو عرف باللي بيان بحال هادا كيفاش كيتصايب وشكون مول الفكرة قبل ما يتعرض. يعني عارف قاع الخابية. 

بنكيران باش رد رد على هادوك اللي بغاو يضربوه. باناقة وذكاء ودهاء خرج رئيس الدولة اللي هو الملك من اللعب وصفى حسابو مع هاد العينة. هاد الاخيرة تقدر تكون شخص او جهة او اكثر من جهة. المهم عرفها بنكيران ورد عليها وكانت ضربتو قوية. 

دابا بحالو لاعب فالمستوى العالي. لاعب فالشامبيانز ليگ علاش كيضر بصورتو مازال مصر يلعب مع الهواة فالسياسة. يلعب مع حزب مع حزبيين مستواهم متواضع. واخا شوية متأخر ممكن يطلق الحزب ويبقى متفرغ للسياسة بمفهومها لكبير ماشي الللا علاش الورث الللا اش هاد التنظيم اللا المعارضة. بعد داك البيان خاصو يطلق الحزب ماشي خوف اللا. قضية مستوى وصافي