كود – وكالات//
النائبة الفرنسية ماتيلد بانو، رئيسة الكتلة البرلمانية ديال حزب “فرنسا الأبية”، قالت بلي جاتهم خبار بلي كاينة شي قنبلة فمقر الحزب فـباريس.
بانوت كتبت فـتدوينة على منصة X بلي السلطات الأمنية دارت لي عليها، وجميع الموظفين والمناضلين خواو المقر، وأكدات بلي كاملين بخير وعلى خير .
وزادت قالت إن هاد الإنذار جا مورا سلسلة ديال الاعتداءات وأعمال التخريب اللي تعرضات ليها مقرات الحزب، زيد عليها التهديدات بالقتل والاغتصاب، وحمّلات المسؤولية للناس اللي كيحرّشو على مهاجمة الحزب وأعضاؤو.
القيادية اليسارية شددات بلي هاد التهديدات ما غاديش توقفهم على النشاط السياسي، وقالت بالحرف: “ما غاديش نستسلمو، وعمركم ما غادي تقدروا تغلبونا.”
قال واحد المصدر فالبوليس لقناة BFMTV، بلي شي حد صيفط إيميل كيهدّد “راه زرعت القنبول فمقرّات ديال LFI، غادي نقتلكم كاملين، غادي نقتل العرب واليساريين وكاع السود. كلشي غادي ينفجر مع الوحدة ديال النهار، وغادي تموتو كاملين غادي تخلصو بثمن حيث خليتو “كوينتين” يتقتل على يد الميليشيات الشيوعية، وفـ2027، غادي نديرو شي أعمال خايبة وخطيرة.”
ومن جهتها، فتحت المصالح الأمنية تحقيق باش تحدد مصدر هاد الإنذار وطبيعتو، واش كيتعلق بتهديد جدي ولا غير كذوب، خصوصاً وأن هاد النوع من الإنذارات كيتعامل معاه الأمن الفرنسي بالمعقول بسبب الحساسية الأمنية فالعاصمة.
موضوعات أخرى
مدير المجلس الاقتصادي فالبيت الأبيض: الحرب مع إيران تقدر تسالي ف6 سيمانات
“المدى” كيبني أوطيل كلاص فالمقر القديم د”أونا” فشارع باريس وسط كازا
