كود الرباط//

حزب الاستقلال، فقيه التحالف الحكومي، كيستعد للدخول السياسي، بحيث وزع إعلان على جميع البرلمانيين باش يحضرو للقاء خاص بفندق حسان بالرباط، اليوم على الساعة السابعة مساء.

فقيه التحالف الحكومي لي داير العصا فالرويضا لأي تعديلات حداثية كتهم مدونة الأسرة والقانون الجنائي، من خلال تصريحات قياداته (رياض مزور وزير الصناعة مثلا) وعدد من البرلمانيين، اليوم باغي يجمع البرلمانيين بمناسبة الدخول السياسي والتشريعي.

هاد اللقاء غريب وعجيب، حزب كيشتغل خارج القانون، وفق مصدر قيادي، مضيفا لـ”كود”: “حزبنا خصو يحشم ويوقف كاع اللقاءات والاجتماعات حتى تكون عندو المشروعية القانونية. حزب لا السلطة منعاتو ولا ضغطات عليه ولا كتهدد فيه، حزب عادي مقدرش يدير القانون وصافي”.

وفهاد السياق وجه نور الدين مضيان، الرئيس الأبدي للفريق الاستقلالي للوحدة والتعادلية (رئيس أبدي للفريق ومبغاش يعطي الفرصة للآخرين، حيث فشل ياخد منصب وزاري)،  دعوة لأعضاء فريقه بمجلس النواب، باش يحضرو لهاد اللقاء.

مضيان لي خرج بحصيلة “زيرو إنجازات” كيواجه مشاكل داخل فريقه النيابي، خصوصا ملي مقدرش ينجح اللجنة الموضوعاتية المكلفة بتقييم 14 سنة من مخطط المغرب الأخضر، هنا كفاءة مضيان تصدمات بالواقع وبان بلي مافيدوش وكيعرف يدير البوليميك، إضافة إلى أنه من الوجوه اللي كادعم المحافظة والقراءة الدينية للنصوص القانونية.