احمد الطيب الرباط كود //
غليان داخل حزب الإتحاد الدستوري بسباب لائحة أعضاء المكتب السياسي. شي وحدين تاهمو الأمين العام محمد جودار بالاستفراد بالقرارات وعدم تشاور القياديين وتهميش المنتخبين وخاصة البرلمانيين اللي هما قلال. طبعا هاد التسخينة عندها علاقة بالانتخابات التشريعية للعام الجاي
شي وحدين تاهمو الأمين العام بللي لائحة أعضاء المكتب السياسي اللي حطها لدى مصالح وزارة الداخلية ماشي هي لي صادق عليها المجلس الوطني للحزب.
الآن، هناك تحركات قوية كيقودها الوزير السابق محمد عبيابة، ومعاه شي برلمانيين ومنتخبين، كيدعيو لعقد دورة استثنائية للمجلس الوطني للحزب باش يتم الكشف عن اللائحة الرسمية لأعضاء المكتب السياسي، وممكن يلجؤو للقضاء ضد جودار والدعوة لمؤتمر استثنائي للإطاحة به. طبعا هاد الشي دابا غير وعيد.
هاد “الحركة التصحيحية” لي كيقودها الوزير السابق عبيابة كتجي فسياق التحركات الأولى لي كتعيشها أغلب الأحزاب استعدادا للانتخابات المقبلة ف 2026، وهاد الشي شعل حرب الترحال السياسي فالاتحاد الدستوري وباقي الأحزاب المتوسطة بحيث أن مصدر قال ل “كود” بلي الحركة التصحيحية داخل الإتحاد الدستوري هي حركة موجهة بالتيليكومند من حزب الحركة الشعبية لي باغي يستقطب عبيابة وصحابو باش ينظامو حتا هوما ل “التكثل الشعبي” المشكل من حزب الحركة، والحزب المغربي الحر، والحزب الديمقراطي الوطني، باش زعما يشكلو “قطب ليبرالي”.
مصدر ل”كود” قال باللي هاد القضية ديال المكتب السياسي والحركة التصحيحية ما عندها اثر فحزب العود. مصدر “كود” اكد بللي هادوك غير كيديرو حرب بالوكالة وصافي. الحزب٬ يضيف مصدر “كود”٬ غادي فطريقو واللي بغى يمشي فحالو يديرها بلا ضجيج
