كود هناء ابو علي ////

فالتقرير السنوي لحرية الصحافة في العالم لسنة 2023 اللي صدراتو منظمة “مراسلون بلا حدود” جا المغرب فالرتبة 144 عالميا. طاح 9 الرتب مقارنة بالعام اللي فات. كان 135. 

تبرير “مراسلون بلا حدود” ان المغرب فيه لحد الان٬ والعهدة عليها٬ 11 صحافي معتقل و3 كولابوراتور. ما قالوش الاسماء. عطاو غير الرقم.
التقرير فيه ان الصحافيين المستقلين فالمغرب كيعانيو من ضعف مستمر وباللي السلطة كتحاول تخلي القطاع تحت اوامرها. ووضحات فقسم المشهد الاعلامي٬ ان التعدد فالصحافة المغربية غير واجهة وصافي وان وسائل الاعلام ما كتعكسش وجهات نظر السياسية فالبلاد. وقال التقرير باللي الصحافيين المستقلين كيواجهو ضغوط كبيرة وباللي الاعلام كيواجه ماكينة قوية ديال البروباگاندا والفايك نيوز باش تخدم اجندات سياسية لناس قراب من السلطة

بالنسبة لهاد المنظمة اخر جريدة مستقلة هي “اخبار اليوم” اللي حطات سلاحها حسب المنظمة فابريل 2021

فالتقرير هدرو علي المناخ السياسي فالبلاد وتأثيرو علي حرية الصحافة وجبدو كذلك الاطار القانوني وفيه جبدو الدستور وقالت المنظمة باللي واخا جاب ضمانات لحرية التعبير والحق فالمعلومة٬ فالممارسة حاجة اخرى. وهدرو على متابعة صحافيين وجبدات الجانب الاقتصادي واكدات باللي الصحافة المستقلة غادية وتقلال وبزز كتوقف علي رجلها وباللي الصحف اللي وفية للسلطة مرتاحة ماديا وبسهولة توصل لموارد مالية بخصوص السياق السوسيو ثقافي اكدات المنظمة ان المغربي كيستهلك الاعلام المستقل بلا ما يدافع عليه وباللي كاين اعلام البوز وديزامفورماسيون اللي ما كيحتارمش الحياة الخاصة وكيهين لمرا

وجبدات المنظمة ما سماتو “الامن” وقالت باللي كاينة اعتقالات بلا ماندا من القضاء. وجبدو احصائيات 2020 بخصوص شكايات قدمخا 110 صحافيا للمجلس الوطني للصحافة على هاد الاخبار الزائفة واعلام ديفاماسيون

اللي ملاحظ فهاد التقرير هو انو ما جبد حتى حاجة على 2023 ومع ذلك رجع لبلاد 9 المراتب. ما كاينش مبرر. ما تحاكم حتى صحافي فهاد العام ما تابع حتى صحافي من الدولة او رموزها بسباب مقال نشرو فجورنال. حتى ايلى كانت متابعة راه القضاء يقول كلمتو.ما جبدش التقرير دعم الدولة للمقاولة الاعلامية. مخلصة فعامين اكثر من 14 شهر صالير للصحافيين. ما هدروش كذلك على الوضع اللي كيعرفو المجلس الوطني للصحافة. 

اللي كتب التقرير بحال شي حد دخل لمقال منشور هادي سنوات ودار ليه التحيين وزادو 2023. 

اييه كاين مشاكل. اييه خاص توفيق بوعشرين وسليمان الريسوني وعمر الراضي ما يبقاوش فالحبس ولكن راه هاد الشي ما وقعش ف2023. ما شرحوش علاش تراجع المغرب ب9 مراتب ما فسروش علاش دخلو المغرب فالصحرا واش عندها علاقة بموقف فرنسا اللي هي مولات منظمة مراسلون بلا حدود؟ ممكن

المغرب خاصو بزاف فحرية الصحافة اييه خاصو بزاف. الموديل الاقتصادي ودعم شركات ديال الدولة لمواقع كتقول راها مقربة من جهات فالدولة فضيحة وكلشي عارفها وساكتين عليها. اييه خاصنا خدمة كبيرة على اخلاقيات المهنة. اييه خاصنا دعم كبير فالتكوين.

اييه خاص وخاص ولكن ماشي بالطريقة اللي قدماتها “مراسلون بلا حدود”. تقرير ديال المخابرات الفرنسية على الوضعية الحقوقية فالمغرب هادا ماشي تقرير منظمة غير حكومية. ما تنساوش راه اللي كان رئيس هاد المنظمة اسمو روبير مينار فين سالى؟ اليمين المتطرف الفرنسي.

حنا خاصنا توسعو حرية الصحافة فالبلاد. فيها مشاكل ولكن ماشي اوربا ولا فرانسا اللي تعطينا دروس