كود الرباط//
بلوكاج جديد فقطاع الصحة، النقابة الأولى فالقطاع حسب نتائج الانتخابات المهنية ديال 2021، واللي هي نقابة الاتحاد المغربي للشغل، رفضت توقع اتفاق مع وزير الصحة خالد ايت الطالب، ورفعت سقف المطالب ومبغاتش تنازل حتى تعتذر الحكومة عن العنف ضد الأطر الصحية والطبية فالمسيرة الاحتجاجية يوم الاربعاء 10 يوليوز 2024.
مصادر نقابية قالت لـ”كود” بلي قيادة الاتحاد المغربي للشغل، وخصوصا الأمين العام الميلودي مخاريق، وجه النقابيين ديالو فالصحة باش يديرو بلوكاج للاتفاق لي تسنا البارح بين وزير الصحة والنقابات.
فمن أصل 8 نقابات، انسحبو جوج نقابات عندهم وزن، الاتحاد المغربي للشغل والنقابة المستقلة للأطباء، ورفضو مخرجات الحوار مع ايت الطالب.
كواليس هاد الانسحاب، حسب مصادر “كود”، مرتبطة بلعبة سياسية داخل الحكومة، بين جوج أطراف، كاينين وزراء دايرين حرب على ايت الطالب، والعكس صحيح هو أن وزير الصحة عندو خلافات مع مسؤولين فالحكومة خصوصا رئاسة الحكومة.
الكاتب الجهوي لنقابة الاتحاد المغربي للشغل بطنجة، في تسجيل صوتي توصلت به “كود”، قال بلي هاد الاتفاق لي وقعو مع وزير الصحة لبارح، تراجعي، ومافيهش داكشي لي تفقو عليه فاتفاق سابق.
وأوضح المسؤول النقابي: “دبا دارو فالاتفاق الجديد 200 درهم للإداريين و500 درهم للممرضين، وتراجعو على الاتفاق السابق لي فيه 1200 درهم تعويض عن الأخطار المهنية للإداريين و1500 درهم للممرضين “.
وشدد المصدر نفسه: “ميمكنش نتحاورو مع وزير الصحة وسبق لينا وقعنا معه اتفاق… وميمكنش ناضلو 8 شهور باش تزاد 200 درهم و500 درهم”.
من التحفظات لي دايرين النقابات هو صفة “موظف عمومي” للي مبقاتش عند الأطر الصحية، وفق نفس التسجيل الصوتي.
دبا كاينين حروب سياسية بين أطراف حكومية حول ملف الصحة، كاين لي بغا يوجه الاحتجاجات ضد رئيس الحكومة واكاين لي باغي يصفي حساباتو مع وزير الصحة، وفالأخير الضحية هوما المواطنين والمرضى.
نقابة الاتحاد المغربي للشغل قالو غايديرو انزال وطني يوم الخميس، ويديرو احتجاجات قوية، وهادشي كيعني كاين دبا انقسام كبير وسط النقابات.
النقابات المحسوبة على احزاب المعارضة متفقة مع وزير الصحة، والنقابات لي قريبة من التحالف الحكومة ضد وزير الصحة، في مشهد نقابي وسياسي مزال ممفوهمش.
