كود سبور//

عبر جمال حركاس لاعب الوداد الرياضي على التأثر ديالو حيث عيط عليه الناخب الوطني وليد الركراكي للمنتخب الوطني المغربي، وقال إنها كانت أمنية الأم ديالو اللي فارقت الحياة قبل أيام.

وتكلم جمال حركاس فتصريح للموقع الرسمي للجامعة الملكية المغربية لكرة القدم وقال: “خبر استدعائي للمنتخب الوطني المغربي فرحني بزاف وفرح عائلتي، والأم ديالي الراحلة كانت ديما كاتقوليا إنشاء الله نشوفك فالمنتخب، وها أنا دابا فالمنتخب وكاندعي معها وكانقولها فرحتك يا الوليدة”.

وكمل حركاس وقال: “أنا مع صحابي دابا وباغي نقدم الإضافة لهذه المجموعة اللي فيها لاعبين كبار وعطاو بزاف للمنتخب الوطني المغربي، ملي هضر معيا وليد الركراكي فرحني بزاف بهذا الخبر وقلت له أنا مستعد نضحي على قبل بلادي وقبل المنتخب وعلى قبل هذا التوني”.

وختم حركاس: “خاصنا نوجدو مزيان للاستحقاقات المقبلة، والگروب اللي كاين دابا واجد لأي تحدي فإفريقيا أو غيرها وحنا ما علينا غير نخدمو ونقدمو الإضافة المرجوة”.