كود -سبتة//

وقف واحد المغربي قدّام القاضي نهار الاثنين اللي فات، بعدما تشد فآخر السيمانة، للاشتباه فاعتدائو جنسياً على امرأة مغربية وسط مدينة سبتة.

وحسب جريدة الفارو دسبتة السلطات القضائية قررات نهار الاثنين تحط المشتبه فيه فالحبس الاحتياطي، بينما يكمل التحقيق،المتهم نفى قدّام السلطات أي علاقة ليه بالواقعة، ولكن القاضي قرر يبقى محبوس احتياطياً حتى تجي المحاكمة.

الواقعة تسجلات فالساعات الأولى من صباح السبت، فواحد المنطقة اللي كتعرف باسم “فوينتي كابايو”، حدا الدروج اللي كيوصلو لابلاج.

حسب المعطيات ، واحد المواطن بلغ البوليس بعدما شاف رجل كيتحرش وكيعتدي جنسياً على سيدة ،عناصر الشرطة الوطنية تدخلات دغيا، وشدات المشتبه فيه .

هاد القضية جات فواحد الظرف اللي كتشهد فيه محاكم سبتة عدد كبير  من الملفات الجنائية المرتبطة بالتدفق البشري الكبير اللي وقع فآخر شهر يوليوز، واللي خلا دخول آلاف الناس  المدينة.

ومن بين القضايا اللي ولات كتوصل بشكل معاود للمحاكم والشرطة، كاينة ملفات مرتبطة بالاعتداءات الجنسية، سواء ضد عيالات راشدات أو ضد قاصرات.