كود سيدي رحال//

عرف دوار غولان، التابع لجماعة سيدي رحال الشاطئ ضمن النفوذ الترابي لإقليم برشيد، البارح في العشية، واحد الحادث مأساوي اللي هز الساكنة كاملين. شاب فْعزّ شبابو طاح فبئر غير مغطاة وما فيها لا حراسة لا تنبيه، كانت مهجورة وسط الدوار.

فور ما توصلت السلطات بالخبر، تحركو عناصر الوقاية المدنية، وبقاو ساعات كايْحاولو ينتشلو الشاب من قاع البئر وسط ظروف صعيبة وخطيرة، وفي الظلام، بسبب العمق ديالها. وبعد مجهود كبير، تمكنو من إخراج الضحية، وسط تأثر كل من تابع هاد المشهد من الساكنة اللي تجمعات فالمكان.

لكن للأسف، في الطريق نحو المستشفى، وْقف القدر فوجه الأمل، وفارق الشاب الحياة قبل ما يوصل لقسم المستعجلات، مخلي وراه حزن كبير فقلوب كل اللي عرفوه وشافو الواقعة.

ولحد الساعة، ما تْعرفاتش الهوية الكاملة ديال الضحية، ولا التفاصيل الدقيقة على الظروف اللي خلاتو يسقط فهاد البئر المهجورة، اللي ولات تشكل خطر كبير على الساكنة، خصوصا الأطفال. ورغم الحملة اللي تعلنات من بعد حادث سقوط الطفل ريان في البئر ضواحي الشاون، إلا أن الكثير من الآبار المهملة نتيجة انعدام المياه بها جراء الجفاف، مازال ما تشكل خطر في سيدي رحال.

الساكنة ديال المنطقة طالبات المسؤولين المحليين يتدخلو بجدية ويسدو الآبار المهجورة، وتدار مراقبة دائمة باش ما يتكررش بحال هاد الحادث اللي هز قلوب الجميع.