كود – كازا //

مؤخرا فتحات حديقة الحيوانات عين السبع ف كازا بيبانها، من بعد ما سالاو أشغال الإصلاح والتأهيل واللي رجعات هاد المعلمة الكبيرة فضاء سياحي، هاد المشروع اللي بدا كيستقبل الزوار من نهار الثلاث للي فات، عرف النهار اللول عدد قياسي وصل 10000 زائر عكس ما تم ترويج ليه ف بعض المنصات بلي مكانش إقبال.

الحديقة كتمتد على مسافة 13 هكتار، وكتعطي تجربة من داكشي رفيع فوسط التنوع البيولوجي، حيث فيها حيوانات من ثلاث قارات: إفريقيا، آسيا وأمريكا الجنوبية، وهكا الزوار يقدرو يعيشو تجربة تعليمية وتفاعلية وياخذو فكرة على الحياة البرية العالمية.

المدير العام ديال حديقة الحيوانات عين السبع، محمد المغرفاوي، عبر على فرحتو بهاد الافتتاح، ووصف الحديقة بـ”الرية الطبيعية فوسط العاصمة الاقتصادية”. وقال إن الجردة فيها كثر من 500 حيوان موزعين على أكثر من 75 نوع، وزاد أن هاد المجموعة كتشكل إرث وطني كيساهم فحماية الأنواع اللي مهددة بالانقراض.

من جهتو، المدير التقني للحديقة، بيير ماري بوجيه، عبر على فرحتو بإعادة الافتتاح مورا مية عام على أول افتتاح، وقال أن هاد المشروع الجديد هو نتيجة سنوات من الخدمة باش يكون مرفق حيوي كيتهلا فالحيوانات مزيان.

الأشغال ديال التأهيل شملات تحسين البنية التحتية، وإعادة تنظيم الفضاءات ديال الحيوانات، ورفع معايير السلامة والنظافة باش يعيشو الحيوانات فظروف حسن هوم والزوار، وزادو صاوبو المساحات الخضراء وجددو بزاف ديال المرافق للعمومية.