سامي العلوي -كود برشيد//

داهمت لجنة مختلطة، فيها القايد ديال أولادزيان والدرك البيئي وأونسا ومسؤولين من عمالة برشيد وجهات أخرى، البارح الاثنين، واحد المعمل سري ديال الزيتون المرقد بدوار بكارة، بالجماعة القروية قصبة بن مشيش بإقليم برشيد، بحيت حجزات 13 طن ديال الزيتون او خيزو فاسد .

وفي هذا السياق، حجزات اللجنة أكثر من 13 طن مخلطة من المواد الاستهلاكية الفاسدة ولي كانت غير صالحة الاستهلاك، ولكن صاحب المعمل اختار دوار بعيد عن الأعين باش يبيع للمواطنين فكازا والرباط زيتون وخيزو مرقدين، لكن يقظة السلطات المحلية والإقليمية دارت ليها حاروما، وحجزوا ليه 5 طن ديال الزيتون مرقد و4 طن ديال خيزو مرقد وطن ديال لهريسة وأطنان أخرى من الملح والصودا ما معروفينش فين مصنوعين، بالإضافة إلى كمية أخرى من بعض المواد الاستهلاكية لي كان باغي صاحب المشروع يبيعها للمواطنين ويصفيها ليهم بمرة.

وقالت مصادر ديال “كود”، فبعد عملية الحجز قررت اللجنة الإقليمية فاش شافت الدود كثير مكشكش على الزيتون وخيزو دير عملية إتلاف فورية في عين المكان. وتحرر محضر باش يتابع صاحب المعمل السري لي اختفى عن الأنظار، والكرة دابا راها عند وكيل الملك بالمحكمة الابتدائية ديال برشيد باش يباشر المساطر القانونية ويحمي المستهلك من هاد للي ما عندهومش الضمير..