كود كازا//

شدات السلطات المحلية اليوم الأربعاء موظف فـ جماعة الحي الحسني بعدما لقاو عندو كثر من 400 لتر ديال المازوط والليصانص مخزنين فـ ظروف خطيرة. هاد العملية طاحت بعدما كان القائد ديال المنطقة كيدير حملة لتحرير الملك العمومي، ووقتاش بداو كيريبو البرايك ديال القزدير، تفاجئو ببوديزات ديال ليصانص مخشين فـ خناشي ومخبين بطريقة مشبوهة.

https://www.facebook.com/share/v/15oyy5QJJG/?mibextid=wwXIfr

رجال الأمن جاو بلاصتو، ومللي مشاو كيشدو الوضع لقاو حتى طونوبيل من نوع Renault عامرة بالبيدونات ديال ليصانص والمازوط، فـ واحد الحي قريب من شارع أفغانستان فـ الحي الحسني. السلطات فتحات تحقيق فـ هاد القضية باش يعرفو المصدر ديال هاد المحروقات وفاش كانت غادي تستعمل.

هاد النوع ديال التخزين العشوائي كيشكل خطر كبير على الساكنة، حيث المواد القابلة للاشتعال بحال ليصانص والمازوط ممكن تسبب كوارث فـ أي لحظة، وهادشي كيطرح تساؤلات على شحال من واحد كيدير نفس الشي بلا ما يبان.