وكالات//

كشفات النجمة سيلينا كَوميز على التأثير النفسي الكبير اللي خلاه فيها التنمّر اللي تعرضات ليه بسبب الوزن ديالها على مرّ السنين، وكيفاش هادشي أثّر على حالتها النفسية.

فحوار جديد مع مجلة Allure، هضرات المغنية والممثلة اللي عندها 33 عام على المعاناة ديالها مع صورة الجسد والوزن، وكيفاش تسبب ليها فاضطرابات داخلية.

وقالت سيلينا: “تعذّبت بزاف مع مشكل الوزن فحياتي، وهاد الموضوع حساس بزاف بالنسبة ليا”، وأكدات أن غير تعليق صغير على الوزن ديالها كيقدر يفيّق مشاعر عميقة ومؤلمة.

باش تواجه هاد المشاعر، قالت سيلينا أنها كتدير العلاج السلوكي الجدلي (DBT)، وهو نوع من العلاج بالكلام اللي كيساعد الناس يتعاملو مع المشاعر القوية. ووصفتو بأنه “بحال كتقشر طبقات”، باش توصل تربط بين التجارب اللي دازت بها والمشاعر اللي كتحس بها دابا، بحال التأثيرات الصحية على شكل جسمها.

وفعام 2014، تشخصات سيلينا بمرض الذئبة، واللي خلاها تدير عملية زرع الكلية وتخضع لعلاجات مستمرة سببات ليها تغييرات كبيرة فوزنها. وشرحات أن الدوا اللي كتستعمل كيسبب ليها احتباس الماء فالجسم، ورغم أنها فاهمة السبب، كيبقاو الناس كينتقدوها بقساوة وكيهضرو بزاف فالسوشيال ميديا.

وفوق من هادشي، سيلينا صرّحات فـ2020 أنها تشخصات بمرض الاضطراب الثنائي القطب، وقالت على هاد التشخيص: “بحال إلى تزاح عليا واحد الحمل ثقيل.”، ومن قبل كانت كتعاني من الاكتئاب والقلق، والضغط الاجتماعي والمعايير الجمالية الزائفة زادو من سوء حالتها.