محمد سقراط-كود///

حتى في عز الإحتجاجات في المغرب والعالم العربي عمرها الدولة كانت كتدير الخاطر لشعيبة أو تبعوا في هواه، ديما الدولة كانت مترفعة ومولاة العقل زعمة وكانت عاطية هامش حرية كبير للجميع، ودابا ملي زكات الوقت والوضعية السياسية والإجتماعية راكدة وزاكية والأمور مستقرة ومظبوطة وبنادم راضي بالمكتاب واخا يكون محكوكة ليه الضبرة، يبدو أن الدولة ولات كتدير الخاطر لشعيبة وخايفاه ليتقلق أو يغضب في كل خرجة كيديرها، وبزاف ديال القرارات ولات كتخاد بناء على رغبة الجماهير الشعبية في مواقع التواصل، الدولة ولات حريصة على شعيبة يبقى على خاطرو وأي حاجة معجباتوش تحيدها بالزربة، المهم هو شعيبة يكون راضي وقانع وفرحان وحاس بلي الدولة في الجيب.

وحدة كتبات ستاتو من واد زم كنا كنكتبوا قود منو هنا نيت ناض شعيبة يطالب برأسها مباشرة ستاجبات الدولة وسيفطوها بعامين،فتيحة كتدير روتيني اليومي ومروجة بيه الوقت وكل مرة كتخلق حدث لزيادة نسبة المشاهدة بحالها في العالم كثار ودايرين مع كثر منها على ألف مرة، نهار حطات فيديو في الطواليط ناض شعيبة كيهلل في المواقع مباشرة تدخلات الدولة ودارت ليه خاطرو للمرة التانية بعد الألف وسيفطات فتيحة وراجلها للحبس وخلات دوك الوليدات بوحدهم، والتهمة شناهي بالسلامة مادام أن داكشي حاطاه في القناة ديالها في موقع على الأنترنيت الدخول اليه اختياري ومسؤولية الفرد والفيديو كيحتارم شروط النشر في الموقع، آش دخل الدولة في هادشي أصلا؟.

فنان رابور موسيقى لي خارجة من الزنقة ماشي دار الأوبرا وكتعبر على ثقافة الزنقة وكيهدر بلغة الزنقة ولغة هاد الجيل، ناضوا ليه الشراف ولي قربوا من سن اليأس ودارو عليه حملة بغاو الراب يولي أمداح ، وهاهو ممنوع من الخروج من مغرب 2022 لي على مايبدو غادي وكيولي شبه مصر لي معجبش شعيبة نرفعوا عليه دعوة ونحبسوه، شنو واقع في هاد البلاد ياك الإنتخابات جرت كما كان مخططا لها، والأوراش الكبرى غادا وكورونا المغرب كان نمودج يحتدى بيه اللقاح موجود مابغاه حد، إذن شنو لي تغير باش الدولة ولات باغا تدير الخاطر لشعيبة في أي حاجة بإسم الشعب، بينما ولاد الشعب لي كيهدرو هادو بسميتهم راه كيتفرجوا برقلو ورباععتو لي ولاو مسيطرين على الويب.