كود سبور//

ما بقاش عند عادل هالا رئيس الرجاء الرياضي شي حد يدافع عليه والأغلبية الساحقة من الرجاويين ناضو يطالبوه بالاستقالة، وحتى اللي كانو كايدافعو عليه ولاو دابا كاينصحوه يمشي بحالو، وهاذ الشي بعد خسارة الفريق مع نهضة بركان مساء اليوم الاحد برسم الدورة 16 من البطولة الاحترافية بنتيجة 2 لزيزو، وبأداء كارثي من لاعبي الرجا، وبوادر موسم صفري بدات كاتبان حيث صدارة البطولة بعيدة على الخضرا بـ13 نقطة، ووضعية الفريق تعقد في دوري أبطال إفريقيا.

وخرج المنخرط الرجاوي عصام الإبراهيمي والكاتب العام السابق للنادي، اللي كان مدافع على الاستقرار الإداري والتسييري فالرجا فواحد الوقت، ووجه له نصيحة علنية، وقال فتدوينة نشرها بعد الخسارة الجديدة ديال الخضرا: “نصيحة لابد منها سي عادل جربتي التسيير،؟؟؟ حطيتي العلم ديالك كامل لي كنتي تا تنظَّرْ بيه ؟؟؟ علق الصورة ديالك فالوازيس ودير ليها كادر مذهب واعلن على جمع عام غير عادي وساعد المنخرطين في تعيين لجنة تصريف الأعمال إلى غاية نهاية الموسم، حاولنا نعطيوك النصيحة ولكن انت عاليييم لا تسمع النصائح من أحد، دير بحال لي دار ذ أنيس عاون لجنة تصريف الأعمال باش تبقى عندك مصداقية ومزيان تعرف بأن التنظير والضغط على الرؤساء السابقين وإحراجهم كان سيكون له ما بعده وها انت تعيشه”.

وقال الإبراهيمي لعادل هالا بشكل واضح: “انصحك بالإعلان عن جمع عام غير عادي و اعتذر للجماهير إن كنت أدافع عن الاستقرار في مرحلة سابقة، الاستمرار مع هذا الرئيس سيكون وبالا على الفريق، شكرا لكم على كل ما قدمتم للفريق سيذكر التاريخ مجهوداتكم لرفع المنع والتدبير الإداري والقانوني الذي قمتم بإرسائه في منظومة الرجاء”.