كود سبور//
بدات الأصوات فأوروبا كاتطالب بأن الدولي المغربي أشرف حكيمي نجم باريس سان جيرمان الفرنسي، هو اللي يستاهل الكورة الذهبية ديال فرانس فوتبول لعام 2025، وهذا الشي حيث النيفو ديالو كان مستقر وسطابل على طول الموسم عكس لاعبين اخرين بحال لامين يامال الاسباني من اصل مغربي نجم البارصا الصبليوني والمصري براهيم صلاح نجم ليفربول النگليزي والفرنسي عثمان ديمبيلي صاحب حكيمي فـ PSG اللي مستواهم كان مرة مزيان ومرة نازال.
وتطرق موقع SOFOOT الفرنسي المتخصص، لشكون يستاهل الكورة الذهبية، وقال علاش ما يكونش أشرف حكيمي اللي هو اللاعب الأكثر انتظاما فالعالم، علاش ما يكونش هو الكورة الذهبية الحقيقية لعام 2025.
وقال الموقع على اشرف حكيمي: “ما كايعياش وما يمكنش تقلبو ولا تغلب عليه، أتقن اشرف حكيمي البوسط ديال الظهير الايمن فباريس سان جيرمان لدرجة انه وصل للكمال دفاعيا وهجوميا، وموجود ديما وما كايبخلش من جهدو، المغربي ما كايوقفش على الجري وهذا الشي كايبان غير ملي كاتشعل التلفزة تفرج فباريس سان جيرمان، كتلقاه قلب هجوم لاعب الـ9، وكاتلقاه جناح وظهير ايمن، كايبغي حكيمي يتفوق على راسو”.
وأكد الموقع الفرنسي أن اشرف حكيمي كان واحد من أحسن لماطر فهاد الموسم ديال باريس سان جيرمان بطل فرنسا وكاس فرنسا وبطل أوروبا، وحاضر ديما فالمواعيد الكبيرة وعلى طول الموسم، وربح جائزة مارك فيفيان فوي لأحسن لاعب أفريقي ممارس ففرنسا، وهو أيضا فالفريق النموذجي لهذا الموسم.
وخلال 34 دورة من البطولة الفرنسية، لعب 71٪ من المباريات وكان لويس انريكي كايعطيه عطلة بعدما حسمو اللقب بكري، وقدر يماركي أربعة اهداف مهمين فدوري ابطال أوروبا، ويعطي 5 تمريرات حاسمة، وفنهائي كأس فرنسا، سجل الهدف الثالث اللي قتل به الماتش ضد ريمس.
ووضح الموقع الفرنسي وقال انه على الواقع وفالحقيقة راه اشرف حكيمي اللي ربح ثلاثية بطولة وكاس فرنسا ودوري أبطال أوروبا، هو أحسن لاعب فالعالم لعام 2025، وهو اللي خاصو يربح الكورة الذهبية لهاد العام بإستحقاق، وهذا التقرير ديال الموقع الفرنسي كايبين ان الفرنسيين بريوسهم مقتانعين بأن الكورة الذهبية اللي كاتعطيها جريدة فرانس فوتبال الفرنسية خاص ياخدها اشرف حكيمي، وماشي غير المغاربة اللي عندهم هاد القناعة.