محمد سقراط-كود///

حتى إلى كانت هادي وحدة من أنجح الحكومات في تاريخ المغرب ولكن بسباب التواصل ديالها غادي يتفكروها المغاربة كأسوء حكومة دازت، لأنها لحد الآن ماعارفاش حتى تسوق منجزاتها على وفرتها، بينما عاطية مساحة كبيرة لخصومها يروجوا عليها الإشاعات والهدرة لي كاينة ولي مكايناش، كيكونوا مواضيع شاغلة الرأي العام، أو كتدير الحكومة شي مشروع مهم غادي يفيد المغاربة، ومع ذلك كتلقى منهم غير الصمت والتجاهل، بلا منهدرو على بايتاس لي مكتشد منو لا حق لا باطل، وحول اللقائات الصحفية لأكثر نشاط ممل في المغرب من بعد عشية العيد، مكتسمع والو مكتفهم والو، والمواطنين كيبقاو عرضة للإشاعات لي كتغدي الشعور بالسخط على هاد الحكومة، لي من المفروض تكون مسؤولة على طمأنة الشعب المغربي وتعطيه فكرة على المستقبل المشرق لي كيتسناه.

فيديوات ديال المتضررين من زلزال الحوز من بعد عام ونص باقين في الخيم في هاد البرد والثلج، الفيديوات شافهم العالم وكولشي كيهدر عليهم وتناقشوا في القنوات العالمية، واش خرج شي حد من الحكومة يقولينا بالدارجة طبعا وماشي بلغة الخشب، ها الموشكيل لي وقع في قضية دوك الناس وهاعلاش باقين تم، وا والو مكاين غير النخال والتجاهل والصمت المطبق، عبديلاه مول السردين داير خبلة في البلاد طالق إشاعة ديال السردين خاص يتباع بخمسة دراهم ، حتى تطورات الإشاعة لأحداث ديال إعتدائات وطرد للبياعة والشراية من السوق، وها كثر من عشرة دالناس متابعاهم النيابة العامة، وبياعة والشراية تكرفصات ليهم سلعتهم هادشي في هرمومو، وأحداث طرد بياعة وقعات في أسواق أخرى، ولحد الآن كأن الحكومة غير معنية بالأمر، وغير بالمنطق راه خاص يكون تواصل حقيقي ولقائات صحفية وخرجات إعلامية، في زمن إكس وتيك توك واليوتوب، راه ترامب حاكم العالم غير بالسوشل ميديا.

حتى الصحافة فاش كيمشيو يغطي وشي نشاط وكيكون بيناتهم شي صحفي شجاع بحال صحفي موقع كود لي سول الفتيت، فاش كيبغيو ياخدو شي تصريح من شي وزير أو وزيرة كيبقاو غير يتسلتوا بحال الى غادي يسولوهم على المحرقة، بينما باقي العالم فيه وزراء كيديرو فيديوات في تيك توك وكيتواصلوا مباشرة مع المواطنين، حنا وزارئنا كيخليوك تحس بحال الى هوما موظفين فشي إدارة سرية، وأن أي كلمة كتخرج من فمهم راه تعتبر من أسرار الدولة، التمانينات ومكانش فيها هادشي، يدخل أي واحد ليوتوب وغادي يلقى البصري كيناقش في البرلمان مع البرلمانيين بالمغربية وكيشرح ويفسر، دابا من بعد أكثر من ربع قرن تولي عندنا حكومة صامتة بحال شي حكومة ديال الإتحاد السوفياتي، الى بقاو ساكتين راه غادي يوليو ينافسوهم اليوتوبورات وتيكتيكورات والمؤثرين يوليو هوما مصدر المعلومة حول حالة البلاد.