كود – كازا///

المحكمة الابتدائية الزجرية فـ عين السبع فكازا حكمات، قبل أيام، على المؤثرة المعروفة فالسوشيال ميديا “روعة بيوتي” بـ 4 شهور ديال الحبس النافذ، وزادت عليها تخلص 20 مليون سنتيم كتعويض لشركة عقارية، بعدما تابعوها بتهم ديال “التشهير والإساءة للسمعة”.

القضية بدات من بعد ما نشرت روعة بيوتي فيديو فـ حساباتها، باينة فيه معصبة وكتشكي من الضوضاء ديال أشغال البناء حدا دارها فنهار حد. الشركة العقارية شافت أن الفيديو فيه “ادعاءات كاذبة” وضر بسمعتها وبمشروعها، ودارت شكاية ضدها.

من بعد، الشركة بدات إجراءات الحجز على الممتلكات والحساب البنكي ديال المؤثرة باش تاخد الفلوس ديال التعويض. وفنفس الوقت صرحات أنها غادي تكمل فطريق الاستئناف، وباغية الحكم يتزاد لسنة ديال الحبس النافذ وتعويض ما يقلش على 300 مليون سنتيم، حيت كاتقول باللي الخسائر اللي تكبدات كبيرة بزاف.