كود – وكالات//

ترامب هاد المرة مطبعش صورتو فالدولار، ولكن فراس حبة «إكستازي»، والصدمة أن هاد الحبة اللي كتتباع بشكل كيشبه راس الرئيس الأمريكي، طلعات مخلطة بمادة PMMA اللي تقدر تقلب سهرة عادية لكارثة صحية.

التحذير جا من معهد «تريمبوس» الهولندي، بعدما دار تحاليل على هاد الحبوب، ولقا فيها كمية كبيرة من مادة PMMA، الحبوب كتحمل صورة ترامب من جهة، ومن الجهة الثانية مكتوب «NL» و«Trump»، وكتباع بألوان منوعة، بينها الأخضر والأصفر.

المشكل ماشي غير فالمادة، ولكن حتى فطريقة تأثيرها،PMMA  عندها مفعول بحال لـMDMA، ولكن كتحتاج وقت بزاف باش يبان تأثيرها، وهاد التأخير كيقدر يجرّ المستهلك لغلطة خطيرة، وياخذ حبة ثانية حيث كيحسب أن الأولى ما خدماتش.

ومن تما كيقدر الخطر يكبر، حيتاش تراكم المادة فالجسم يقدر يرفع احتمال التسمم والجرعة الزائدة، خصوصاً مع ارتفاع خطير فدرجة حرارة الجسم ومضاعفات صحية تقدى تهدد حياة الشخص.