كود سبور//

كايعيش الرجاء الرياضي ملي تحيد الرئيس السابق محمد بودريقة، وضع تسييري صعيب بزاف، وهاد الشي أثر حتى على ما هو تقني وكان سبب فبداية كارثية حصدها الفريق الأخضر ملي بدا هذا الموسم، بعدما دوز الموسم الماضي واحد من أحسن المواسم ديالو بالتتويج بلقبي البطولة وكأس العرش.

الوضع فالرجاء الرياضي، صعيب بزاف ولا يبشر بالخير، وحسب مصادر مطلعة فالمدرب الحالي البرتغالي ريكاردو سا بينتو ما قادرش يضبط الفيستيير، ويفرض الكلام ديالو على اللاعبين، وعندو خلافات مع عدد منهم، لدرجة أنه بعدما سالا الماتش ديال الخضرا والمغرب التطواني بالتعادل السلبي زيرو لزيرو، المدرب ما مشاش مع اللاعبين فالكار ديال الفريق وشد هو وشي عناصر من الصطاف ديالو طاكسي داهم من التيران.

هذا الشي يؤكد أن الرجاء الرياضي، الفريق التاريخيّ والمرجعي، حالو ما كايفرحش وأن فيه مشاكل وخاصها تحل دغيا، وخصوصا على مستوى التسيير، حيث النادي اللي وصل للعالمية قبل محمد بودريقة وكان وصيف بطل العالم مع بودريقة وربح معه البطولة الذهبية والازدواجية، وللا المدرب ديالو كايركب فالطاكسي كبير من التيران ورا الماتش وما يمشيش مع الفريق.