كود سبور//

مازال البوسني الفرنسي وحيد حاليلوزيتش المدرب السابق للمنتخب الوطني المغربي، ما تقبلش الانفصال عليه اللي كان قبل اشهر من كاس العالم 2022، بعدما كانت عندو مشاكل مع عدد من اللاعبين المهمين واللي حيدهم من المنتخب المغربي لأسباب كايقول هو انضباطية وهما كايقولو غير مقنعة بحال واقعة شرب الما مع نصير مزراوي، وإبعاد حكيم زياش اللي كان فالطوب ديالو، قبل تدخل الجامعة الملكية المغربية لكرة القدم برئاسة فوزي لقجع والانفصل عليه حيث ما بغاش يتنازل على القرارات ديالو من أجل المصلحة العامة والأول للمنتخب، وتعيين وليد الركراكي اللي قدر يجمع الشمل والگروب والنتيجة كانت تحقيق المنتخب المغربي لإنجاز دومي فينال مونديال 2022، ومن بين اللاعبين اللي تألقو وساهمو فهاد الإنجاز حكيم زياش اللي كان مجري عليه حاليلوزيتش من ليكيب ناسيونال.

وحيد حاليلوزيتش اللي كايقول انه ما بقاش باغي يهضر فموضوع المنتخب المغربي والتجربة ديالو معه، خرج على قناة On sport المصرية، وقال: “ما كاين حتى شي سر، ملي كاتكون ناخب وطني راه كادير خدمتك، عاودت بنيت منتخب يستاهل المكانة ديالو وقدرنا نربحو تقريبا گاع الماتشات ديال اقصائيات كاس العالم، ربحنا 7 من الماتشات وماتش تعادلنا فيه”.

وكمل وحيد حاليلوزيتش، وقال: “وبخصوص لاليست د اللاعبين لكاس العالم، الرئيس بغا يفرض 2 اللاعبين وانا ما بغيتش وما قبلتش هذا الشونطاح وتفارقنا وهذا الشي اللي كاين وما باغيش نهضر فهذا الموضوع تاني”.

هذا التصريحات ديال حاليلوزيتش فيها اعتراف ضمني بصحة قرار الانفصال عليه، إياه راه كلشي عاقل ان وحيد قدر يربح ماتشات مهمين فالإقصائيات ديال كاس العالم 2022، واخا طريقة اللعب والأداء ما كانش مقنع، ولكن كلشي عاقل حتى على الصرامة ديالو مع اللاعبين واللي زايدة شوية على الحد ديالها، وهذا الشي طيحو هو كناخب وطني فمشاكل مع لاعبين مهمين على راسهم النجم الاول فالمنتخب فهاداك الوقت حكيم زياش اللي حتى هو عندو كراكطير بوحدو ونصير مزراوي، وطيح المنتخب المغربي فانقسامات، وخلى الجامعة الملكية المغربية لكرة القدم برئاسة فوزي لقجع تحاول تتدخل بخيط بيض بيناتهم ولكن قصوحية راس حاليلوزيتش، اضطرت الفيديراسيون تغامر وتقرر الانفصال عليه قبل 3 اشهر من كاس العالم 2022، وتعين وليد الركراكي فبلاصتو، ومن بعد كاس العالم بان ان هذا القرار كان صائب حيث المغرب حقق إنجاز تاريخي بالوصول لدومي فينال لاكوب ديموند، وهذا الشي راه كان مستبعد كون بقى حاليلوزيتش بسبب المشاكل اللي كانت عندو مع اللاعبين.