سعيد بوناصر – كود //
برغم من المجهودات الكبيرة اللي كديرها السلطات العليا فبلادو باش تصلح علاقتها مع المغرب، ناض رئيس حكومة مليلية المحتلة وتحفظ فإعلان موقفو فنفس الرؤية ديال بلادو، باش يدعم حتى هو ويعلن على الالتزام ديالو فاحترام السيادة المغربية والوحدة الترابية للمملكة، بحيث قال فحوار ديالو مع واحد المنبر الإعلامي الصبليوني “إل كونفيدونثيال” بللي ماخاصش المراحل تتحرق، ولازم يتسناو تفعيل الاتفاقيات بين البلدين.
دي كاسترو قال فنفس الحوار بللي المغرب كان من زمان شريك ما فيه ثقة، ولكن خاص تتعطالو فرصة، وأكد على أن مليلية المحتلة اللي فالعمر ديالها 524 عام هي مدينة صبليونية، وما عمر المغرب مارس السيادة ديالو عليها، واللي كيطالبو باش ترجع تحت السيادة المغربية فراهم غير كيخرفو.
المهم فهادشي كلو، أن العلاقات بين المغرب والصبليون رجعات كتقاد وتفكات المشاكل اللي كانت طاغية عليها، على حسب ما قال دي كاسترو، اللي دار جرد للخسائر اللي ضربات مليلية المحتلة من نهار سد عليهم المغرب، وصلات ل700 مليون أورو، وقال بلي سكان المدينة المحتلة فرحات بزاف فاش دار الحل، حيث ممكن ترجع الحركة دور عندهم إذا الصبليون وفاو بالاتفاق اللي داروه مع المغاربة.
موضوعات أخرى
مواطن سويدي مبحوث عليه دوليا طاح فأكادير وها التفاصيل
لي عندو الصرع… أول دوا مغربي مصايب من القنب الهندي عليه إقبال فميلانو
