وكالات//

وقع فـ العاصمة ديال كوريا الجنوبية، سيول،  حادث مروع فواحد من ساعات الذروة، بعدما راجل عندو 67 عام، اللي معروف عند عائلتو باسم “وون”، دار شي حاجة خطيرة بزاف.

كاميرات المراقبة بينات اللحظة اللي كب فيها هاد الراجل سائل قابل للاشتعال فواحد العربة ديال المترو اللي كانت عامرة بالركاب، وشعل فيها العافية.

الناس اللي كانو داخل الترام بداو كيحاولو يهربو عبر الممرات الضيقة، وكاين اللي تزلق وسط الفوضى والخوف.

السلطات قالت باللي الحادثة وقعات فـ 31 ماي الماضي، وسببات في جرح 6 ركاب مباشرة، وكاين 23 واحد آخرين تنقلو للسبيطارات بسبب انهم استنشقو الدخان وبعض الإصابات الخفيفة.

المتهم تيواجه تهم ثقيلة بحال الشروع في القتل، الحرق العمد، وخرق قانون سلامة السكك الحديدية، والنيابة العامة وصفت هاد الحادث بكونه “جريمة إرهابية كتهدد حياة بزاف ديال الناس”.