گود سبور//

فرحو لاعبين المنتخب الوطني المغربي لأقل من 20 عام، واللي كلهم من جيلZ، (فرحو) بتأهل المنتخب لفينال كاس العالم لأقل من 20 عام، بعدما ربحو فرنسا فالدومي فينال بالبينالتيات، ووادعو الجمهور المغربي باش يربحو الكاس.

بيار لاعب المنتخب المغربي لأقل من 20 عام فـ تصريح لقناة الرياضية: “نهار كبير اليوم والصراحة درنا ماتش كبير عطينا گاع اللي عندنا من اللول حتى اللخر، وفخورين بهذا الشي وراه لأول مرة فـ التاريخ وما كاينيش الكلمات باش نعبر حيث المشاعر كثيرة ولكن فرحانين بزاف، شكرا للصطاف وللجميع وللجمهور ولعائلتي ولمراتي على كل ما عطاوه ليا”.

وهضر اللاعب ياسين الخلفي وقال: “الفرحة ديالنا ما كتصورش وكانشكر الدراري بزاف والصطاف، وگاع اللي تقاتل وجينا هنا باش نديو الكاس وباقي لينا دابا ماتش واحد باش نحققو الحلم ديالنا، وغانعطيو كل ما عندنا فالفينال، ودابا غادي نرتاحو 4 أيام باش نلعبو ماتش الفينال”.

اما مصباحي الحارس الاحتياطي اللي دخل على قبل البنالتيات وقدر يحبس وحدة من أصل 2 ضاعو لفرنسا، قال: شرف ليا أنني كان عندي دور فـ هاد التأهل التاريخي للمنتخب المغربي، هذا إنجاز كبير خدمنا عليه والشعب كان ورانا، وهذا الشي جا بالخدمة ماشي من فراغ، وفـ البداية ديال السطاج الكوتش وهبي قالينا حتى واحد هنا ما عاطيه كادو وفـ أي وقت واخا تكون دوزيام ولا طروازيام گارديان ولا ما وعت غادي تعاون الفرقة كاملين يد فـ يد اللي دخل كايقدي الغرض”.