كود -وكالات//

مزال نايضة ففرنسا مني كبرات الاحتجاجات ديال التلاميذ واللي توسعات لعدد كبير من المدن، الشي لي خلاها تعرف مضاربة مع البوليس وإغلاق عدد من الثانويات.

السلطات الفرنسية قالت باللي وقفات 1747  غير نهار الجمعة ، باش يوصل لعدد كامل لأكثر من 5 آلاف موقوف من الاثنين.

وزير الداخلية لوران نونييز قال أن 735 مؤسسة تعليمية تغلقات، كيف ما تسجلات أعمال عنف حدا 158 مؤسسة، تهاجمو فيها قوات الأمن والأساتذة والصحافيين وحتى الناس لي دايزين.

https://x.com/JesseCohenInv/status/2106076692968083920

الاحتجاجات بدات نهار 17 شتنبر فجهة باريس، ومن بعد انتشرات  فمناطق مختلفة من البلاد، التلاميذ سدّو مداخل الثانويات ديالهم ودخلو فمواجهات مع البوليس، احتجاجاً على طول ساعات الدراسة، والظروف اللي كيقراو فيها، خصوصاً الحرارة  وسط الأقسام، و غياب عدد من الموظفين.

الأحداث خرجات حتى على سياق المطالب وتوسعات لتخريب وسرقة المحلات التجارية وتهراس الطوموبيلات وعرقلة السير,الحكومة الفرنسية قالت بلي هاد المطالب مفهومة ولكن العنف مرفوض.