أيوب الطنطاوي-كود//

عرفات بلدة بور”غونوفو” بنواحي مدينة “بياتشينسا” إستنفار أمني و حالة كبيرة من الهلع ،بعد قيام طفل مغربي فعمرو 14 عام بسرقة سيارة الأب ديالو، وصاكها مع 4 من صحابو.

وذكرت الصحافة المحلية، أن الطفل المغربي تفاجأ وهو كيدور بالسيارة مع الصحاب والصحابات، بقيام وحدة أمنية تابعة لمصالح “الكربنييري” بإيقافو فضواحي المدينة، إلا أن راسو قاسح، ورفض يمتاثل لأوامرهم بالتوقف، الشيء لي أدى لفرارو ومطاردة الوحدة الأمنية ليه لمسافة طويلة، وماوقفش حتى وصل لمنطقة غابوية، وطلق رجليه للريح ومعاه جوج من صحابو لي حتى هما من أصول مغربية، لكن بقاو جوج بنات من صحاباتهم فاالسيارة، وحدة إيطالية والاخرى رومانية حيت فظلو يسلمو راسهم على الهرب.

هذا وبعد عملية تمشيطية قامت بيها المصالح الأمنية فالغابة الي هربو ليها  المراهقين الثلاثة، لقاوهم وشدوهم بتهمة مقاومة رجال الأمن وعدم الأمتثال لأوامرهم، وتم حجز السيارة لمدة شهر.